ماس كۇيىندە كولىك تىزگىندەپ العاش رەت ۇستالعان ازامات بىردەن 7 جىلعا جۇرگىزۋشى كۋالىگىنەن ايىرىلادى، دەپ حابارلادى  sputnik.kz سايتى. 

– اكىمشىلىك جازانىڭ جاڭا ءتۇرى ەنگىزىلەدى. ول – ارەست. ونى مىندەتتى تۇردە قولدانادى. جۇرگىزۋشى ماس كۇيىندە العاش رەت ۇستالسا دا، 15 تاۋلىككە قامالادى. جول اپاتى كەزىندە ادامداردىڭ دەنساۋلىعىنا زيان كەلمەسە، ءبىراق ماتەرالدىق شىعىن بولعان جاعدايدا اكىمشىلىك ارەستتىڭ مەرزىمى 20 تاۋلىككە ۇزارتىلادى. كولىكتى ماس كۇيدە جۇرگىزسە 7 جىلعا كۋالىگىنەن ايىرىلادى، – دەدى ىشىكى ىستەر مينيسترلىگى اكىمشىلىك پوليسيا كوميتەتىنىڭ باسقارما باستىعى اسقار تاجەنوۆ بريفينگ بارىسىندا.

مينيسترلىكتىڭ سوزىنشە جۇرگىزۋشى كۋالىگىنەن ايىرىلعان ادام ءبىر جىلدىڭ ىشىندە رولگە قايتا  وتىرسا 20 تاۋلىككە قامالىپ، 8 جىلعا كولىك جۇرگىزۋ قۇقىعىنان ايىرىلادى.

– ال ماس كۇيدە كولىكتى قايتا تىزگىندەگەندەر 5 جىلعا دەيىن باس بوستاندىعىنان شەكتەلىپ، جۇرگىزۋشى كۋالىگىنەن ءومىر بويىنا ايىرىلۋى مۇمكىن. جول اپاتىنا تۇسسە 8 جىلعا، وقيعا سالدارىنان كىسى ءولىمى تىركەلسە 10 جىلعا دەيىن باس بوستاندىعىنان شەكتەلەدى.

سونىمەن قوسا مەديسينالىق تەكسەرىستەن باس تارتقان ازامات 8 جىلعا جۇرگىزۋشى كۋالىگىنەن ايىرىلادى. بۇرىن بۇل مەرزىم 3 جىل بولعان. سوسىن 15 تاۋلىككە قامالۋى مۇمكىن، – دەدى مينيستر.