دەموكراتيالىق پارتيا باستاماشىل توبى قازاقستاننىڭ جاڭا كونستيتۋسياسىنىڭ جوباسىن ۇسىندى. جوبا 11 ءبولىم، 138 باپتان تۇرادى. بەلسەندىلەر جانبولات ماماي مەن تولەگەن جۇكەيەۆ باسپا ءسوز جيىنىن وتكىزىپ، جوبانى تانىستىردى.

باستاماشىل توپ جەتەكشىسى، بەلسەندى جانبولات ماماي قازاقستاندا حالىق كونستيتۋسياعا، زاڭدارعا سەنبەيتىنىن، قولداعىستاعى 1995 جىلعى كونستيتۋسياعا كوپتەگەن كوپتەگەن وزگەرىس ەنگىزىلگەنىن اتاپ وتكەن.

سوزدەرىنشە، ۇسىنىلىپ وتىرعان جوبا وركەنيەتتى، دامىعان ەلدەردىڭ كونستيتۋسياسىنا، زاڭدارىنا نەگىزدەلىپ، كوپتەگەن وزگەرىستەرمەن تولىققان. بەلسەندى سولاردىڭ ءبىرى رەتىندە "قازاقستان رەسپۋبليكاسىنىڭ مەملەكەتتىك تاۋەلسىزدىگى ءابسوليۋتتى جانە وعان قول سۇعىلمايدى. قازاقستان رەسپۋبليكاسى قانداي دا وداقتىق، كونفەدەراتيۆتىك جانە باسقا دا كەز كەلگەن كۆازيمەملەكەتتىك قۇرىلىمداردىڭ مۇشەسى بولمايدى" دەلىنگەن 4-باپتى اتاپ ءوتتى.

سونداي-اق بەلسەندىلەر 8-باپتىڭ 3-تارماعىنا ساي "قازاقستان رەسپۋبليكاسىنىڭ ازاماتتارى بيلىكتى ۋزۋرپاسيالاۋعا ۇمتىلعان جانە ونى زاڭسىز ۇستاۋعا تىرىسقان كەز كەلگەن ادامعا قارسى تۇرا الادى" دەگەن نورماعا ەكپىن جاسادى.

جوبادا بۇدان وزگە تومەندەگىدەي ءىرى ۇسىنىستار بار:

♦ بيلىكتىڭ بارلىق تارماقتارى زاڭنامالىق، اتقارۋشى جانە سوت ۇستانىمى بويىنشا بولىنەدى، ءبىر ءبىرىن شەكتەيدى. زاڭنامالىق بيلىكتى قازاقستان رەسپۋبليكاسىندا ۇلتتىق قۇرىلتاي جۇزەگە اسىرادى، اتقارۋشى بيلىك – ۇكىمەتتە، سوت بيلىگى – سوتتا. 

♦ جەر تەك قانا مەملەكەت مەنشىگىندە بولادى.

♦ ءدىني ۇيىمدار ساياسي پروسەستەرگە ارالاسۋعا، قانداي دا ساياسي كۇش ءۇشىن ۇگىت ناسيحات جۇرگىزۋگە جانە ونى قارجىلاندىرۋعا قۇقى جوق.

♦ قازاقستان رەسپۋبليكاسى مەملەكەت اۋماعىنان تىس ءومىر سۇرەتىن ەتنيكالىق قازاقتارعا قولداۋ كورسەتەدى جانە ولاردىڭ تاريحي وتانىمەن بايلانىسىن قامتاماسىز ەتەدى.

♦ قازاقستان رەسپۋبليكاسىنىڭ قارۋلى كۇشتەرى ساياسي ماقساتتا بەيبىت ازاماتتارعا قارسى قولدانىلمايدى، قازاقستان رەسپۋبليكاسىنىڭ اۋماعىندا شەت مەملەكەتتىڭ قارۋلى كۇشتەرى ورنالاستىرىلمايدى.

♦ قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى. قازاقستان رەسپۋبليكاسى ورىس ءتىلىن جانە باسقا ەتنيكالىق ازشىلىقتاردىڭ تىلدەرىن ساقتاۋعا قۇقىق بەرەدى.

♦ قازاقستان رەسپۋبليكاسىنىڭ استاناسى الاش-وردا قالاسى بولىپ تابىلادى.

♦قازاقستان رەسپۋبليكاسى مەملەكەت اۋماعىنان تىس ءومىر سۇرەتىن ەتنيكالىق قازاقتارعا قولداۋ كورسەتەدى جانە ولاردىڭ تاريحي وتانىمەن بايلانىسىن قامتاماسىز ەتەدى. ءاربىر ەتنيكالىق قازاق، قازاقستان رەسپۋبليكاسىنىڭ ازاماتى بولماسا دا جانە قازاقستان رەسپۋبليكاسى ازاماتىمەن تىكەلەي تۋىستىق قاتىناستا بولماسا دا، ەگەر ءوزىنىڭ شىعۋ تەگىن دالەلدەي السا، قازاقستان رەسپۋبليكاسىنىڭ ازاماتتىعىن الا الادى.

♦ ۇلتتىق قۇرىلتاي قازاقستان رەسپۋبليكاسى بيلىگىندەگى جوعارعى زاڭ شىعارۋشى جانە وكىلەتتى ورگان بولىپ سانالادى. ۇلتتىق قۇرىلتاي تەڭ جارتىسى تەپە-تەڭدىك جۇيەسى ارقىلى، ال كەلەسى جارتىسى – ءبىر مانداتتى ايماقتىق وكرۋگتەردە سايلاناتىن ءبىر ءجۇز جيىرما دەپۋتاتتان تۇرادى. ۇلتتىق قۇرىلتاي دەپۋتاتتارىنىڭ وكىلەت مەرزىمى ءتورت جىل. ۇلتتىق قۇرىلتايعا سايلاۋ جالپىعا ورتاق، اشىق، تەپە-تەڭ، توتە  جانە قۇپيا داۋىس بەرۋ ارقىلى وتەدى.

♦  قازاقستان رەسپۋبليكاسى پرەزيدەنتىنىڭ وكىلەتى بەس جىلعا سوزىلادى. ءبىر ادام قازاقستان رەسپۋبليكاسىنىڭ پرەزيدەنتى بولىپ قايتارا سايلانا المايدى. قازاقستان رەسپۋبليكاسىنىڭ ازاماتتارى ءوزىن ءوزى قازاقستان رەسپۋبليكاسىنىڭ پرەزيدەنتىنە كانديدات رەتىندە ۇسىنا الادى.  پرەزيدەنت ءوز وكىلەتىن اتقاراتىن مەزگىلدە ساياسي پارتيا مۇشەسى بولا المايدى.

بەلسەندىلەر جوبا بويىنشا رەفەرەندۋم وتكىزۋگە مۇمكىندىك بەرمەيتىنىن، ءبىراق سوندا دا جوبانى تالقىلاۋعا شاقىردى.