سۋعا شومىلۋ كەزەڭى – 1 ماۋسىمنان باستاپ ءوز كۇشتەرىن دۇرىس باعالاماۋ، ماس كۇيدە سۋعا شومىلۋ، شومىلۋعا تىيىم سالىنعان جەرلەردە بالالاردى ۇلكەندەردىڭ قاراۋىنسىز قالدىرۋ سەكىلدى جاعدايلاردىڭ سالدارىنان 149 ادام، ونىڭ ىشىندە 52 بالا سۋعا باتىپ قايتىس بولعان. سۋعا باتقانداردىڭ ەڭ كوپ سانى – الماتى (19)، تۇركىستان (16)، شىعىس قازاقستان (15) جانە اقمولا (14) وبلىستارىندا تىركەلگەن.

سۋعا شومىلۋ كەزەڭى باستالعالى 111 ادام، ونىڭ ىشىندە 23 بالا قۇتقارىلعان.

سۋ ايدىندارىندا ادامداردىڭ قازا بولۋىنا جول بەرمەۋ ماقساتىندا مينيسترلىك تاراپىنان 407 مىڭنان استام ۇگىت-ناسيحات ءونىمى (بۋكلەتتەر، پاراقشالار) تاراتىپ، 2 مىڭعا جۋىق جيىن وتكىزگەن.

مينيسترىلىك ازاماتتاردى سۋ ايدىندارىنداعى قاۋىپسىزدىك ەرەجەلەرىنىڭ تالاپتارىن ساقتاۋعا شاقىرىپ، تومەندەگىدەي ەرەجەلەردى قاتاڭ ۇستانۋعا ۇندەيدى.

- سۋعا ماس كۇيدە شومىلماۋعا؛

- قايىقتاردان، كاتەرلەردەن، ايلاقتاردان، سونداي-اق وسى ماقساتتارعا بەيىمدەلمەگەن قۇرىلىستاردان سۋعا سەكىرمەۋگە؛

- تەكسەرىلمەگەن جانە جابدىقتالماعان جەرلەردە سۇڭگىمەۋگە؛

- ءجۇزۋ شەكاراسىن بەلگىلەيتىن اۋماقتان تىس جۇزبەۋگە؛

- تەك جۇزۋگە ارنالعان زاتتارمەن جۇزۋگە؛

- ەرەسەكتەردىڭ قاراۋىنسىز بالالارعا سۋعا جىبەرمەۋگە.

"ءار ادام ءقاۋىپتى جەرلەردى جانە شومىلاتىن سۋ قويماسىنىڭ ەرەكشەلىكتەرىن ءبىلۋى كەرەك، ويتكەنى جابدىقتالماعان جەرلەردە تاستار، سۋ باسقان بورەنەلەر، تەمىر كەسەكتەرى، شىنى جانە باسقا زاتتار بولۋى مۇمكىن" دەلىنگەن مينيسترلىك مالىمدەمەسىندە.