شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، شىلدە ايىندا 9746 وتباسىعا، ياعني، 45 046 ازاماتقا اتاۋلى الەۋمەتتىك كومەك تولەنگەن. اتاۋلى الەۋمەتتىك كومەككە ءوتىنىشتى ەلەكتروندى ۇكىمەت پورتالى ارقىلى ونلاين تاپسىرىپ، ازاماتتار وزدەرىنە قاتىستى مالىمەتتى ەسق كىلتىن قولدانىپ بىلە الادى.

حالىق دەنساۋلىعىنىڭ قاۋىپسىزدىگىن قورعاۋ ماقساتىندا ااك الۋعا قۇجات تاپسىرۋ، ونىڭ تاعايىندالعانى جونىندە ءبىلۋ جانە تولەمدەردى جۇرگىزۋ جۇمىستارىنىڭ بارلىعى ونلاين جۇيەدە اتقارىلۋدا. ول ازاماتتاردىڭ ۋاقىتىن ۇنەمدەۋگە مۇمكىندىك بەرەدى.

جالپى اتاۋلى الەۋمەتتىك كومەك قازاقستان رەسپۋبليكاسىنىڭ «مەملەكەتتىك اتاۋلى الەۋمەتتىك كومەك تۋرالى» زاڭى مەن «مەملەكەتتىك اتاۋلى الەۋمەتتىك كومەكتى تاعايىنداۋ جانە تولەۋ قاعيدالارىن بەكىتۋ تۋرالى» زاڭىنا سايكەس، وتباسىنىڭ تابىسى كەدەيشىلىك شەگىنەن اسپايتىن ادامعا نەمەسە وتباسىعا تاعايىندالىپ، تولەنەدى.

2021 جىلدىڭ ءۇشىنشى توقسانى بويىنشا كەدەيشىلىك شەگى 23 678 تەڭگەنى قۇرايدى. سونىمەن قاتار، تابىسى از وتباسىلاردىڭ بالالارىنا كەپىلدەندىرىلگەن الەۋمەتتىك توپتامانىڭ 260 مىڭنان استامى تاراتىلدى. 1 جاستان 6 جاسقا دەيىنگى بالالارعا ازىق-تۇلىك تاۋارلارى اي سايىن، ال تۇرمىستىق حيميا توقسان سايىن تاراتىلۋدا. ازىق-تۇلىك تاۋارلارىنىڭ ىشىندە ءتۇرلى جارما، ءسۇت، شىرىن، پيۋرە جانە ت.ب. بار. بۇل ازىق-تۇلىك ونىمدەرىن تەمىر مەن باسقا دا دارۋمەندەردىڭ، مينەرالداردىڭ جەتىسپەۋشىلىگىن ەسكەرە وتىرىپ، دەنساۋلىق ساقتاۋ مينيسترلىگىنىڭ ۇسىنىسى بويىنشا تاراتىلادى. ءار بالاعا ءبىر كەپىلدەندىرىلگەن پاكەتتەن بەرىلەدى.

ازىق-تۇلىكتەر «Gramad» ساۋدا ءۇيىنىڭ دۇكەندەر جەلىسىندە كۇندەلىكتى جانە دەمالىسسىز ساعات 9:00-دەن كەشكى ساعات 18:00-گە دەيىن تاراتىلادى. ساۋدا ءۇيى كەپىلدەندىرىلگەن الەۋمەتتىك پاكەتتى تەك قانا @aspgramadbot تەلەگرام بوتى ارقىلى حابارلايدى. بوت ارقىلى ازىق-تۇلىك بەرۋ بەكەتتەرىنىڭ مەكەنجايلارىن جانە كۇنى مەن ۋاقىتىن بىلۋگە بولادى. ول ءۇشىن بالانىڭ جسن ءنومىرىن ەنگىزۋ قاجەت. ازىق-تۇلىك ساپاسىنا ارىز-شاعىم تۇسكەن جاعدايدا ساۋدا ءۇيى زاتتى اۋىستىرۋعا كەپىلدىك بەرەدى.

جالپى، اتاۋلى الەۋمەتتىك كومەك – بۇل مەملەكەتتەن ۋاقىتشا قارجىلاي قولداۋ. ازاماتتاردىڭ جاعدايىن جاقسارتىپ، اياققا تۇرىپ كەتۋ ماقساتىندا تولەنەدى. تۇرعىندار مۇنى ءجىتى ۇعىنۋى ءتيىس.

شارتتى اقشالاي كومەك تابىسى از جالعىزىلىكتى نەمەسە جالعىز تۇراتىن ەڭبەككە قابىلەتتى نەمەسە قۇرامىندا ەڭبەككە قابىلەتتى مۇشەلەرى بار وتباسىلارعا كورسەتىلەدى. جۇمىسقا قابىلەتتى مۇشەلەرى جۇمىسپەن قامتۋدىڭ بەلسەندى شارالارىنا قاتىسقان جاعدايدا عانا اتاۋلى الەۋمەتتىك كومەك بەرىلەدى.