قازاقستان رەسپۋبليكاسىنىڭ پرەمەر-مينيسترى ا.ءماميننىڭ توراعالىعىمەن وتكەن سەلەكتورلىق ماجىلىستە شىمكەنت قالاسىنىڭ اكىمى م.ايتەنوۆ قالانىڭ ۇلتتىق ساناققا دايىندىعى تۋرالى ەسەپ بەردى.
حالىق ساناعى ەل تۇرعىندارىنىڭ دەموگرافيالىق، ەكونوميكالىق جانە الەۋمەتتىك جاعدايىن سيپاتتايتىن ناقتى ستاتيستيكالىق دەرەكتەر جيناۋ ءۇشىن جاسالادى. ونىڭ قورىتىندىسى مەملەكەتتىك دامۋ باعدارلامالارىن ازىرلەۋگە نەگىز بولادى.
ۇلتتىق ساناقتىڭ 1-30 ماۋسىم ارالىعىندا وتكەن ءى كەزەڭىنە 29 نۇسقاۋشى-باقىلاۋشى جانە 198 ينتەرۆيۋەر تارتىلىپ، قالانىڭ بارلىق شاعىن اۋداندارى مەن تۇرعىن الاپتارىن ارالاپ، تۇرعىن ۇيلەردىڭ، ادام تۇرۋى مۇمكىن عيماراتتار مەن تۇرعىن ەمەس ءۇي-جايلاردىڭ ءتىزىمىن جاساقتاعان.
بيىلعى جىلعى 1-30 قازان ارالىعىندا وتەتىن ساناقتىڭ ءىى كەزەڭىنە 186 نۇسقاۋشى-باقىلاۋشى جانە 1304 ينتەرۆيۋەرلەر قامتىلماق. بۇل جۇمىستارعا جوعارى وقۋ ورىندارىندا، كوللەدجدەردە ءبىلىم الاتىن ستۋدەنتتەر، نۇسقاۋشى رەتىندە نيەت بىلدىرگەن مۇعالىمدەر، ادىسكەرلەر، ءۇي جانە كوشە باسقارۋشىلارى، اۋىل بيلەرى تارتىلۋدا.
قالا اكىمى بۇل جۇمىستاردى ۇيىمداستىرىپ، وتكىزۋگە شىمكەنت قالاسى تولىق دايىن ەكەندىگىن مالىمدەدى.
قالا باسشىسى اتاپ وتكەندەي، ساناق ناۋقانى بارىسىندا قالىپتاسىپ وتىرعان ەپيدەميولوگيالىق جاعداي بارىنشا ەسكەرىلگەن. ساناق پەرسونالى ءوز مىندەتتەرىن اتقارۋ بارىسىندا سانيتارلىق تالاپتاردى ۇستانادى جانە كوروناۆيرۋسقا قارسى ۆاكسينا الۋدا.
قالانىڭ ءىرى كاسىپورىندارىندا، ساۋدا ورتالىقتارىندا، حالىققا قىزمەت كورسەتۋ ورتالىقتارىندا، كاسىپكەرلەر پالاتاسى عيماراتىندا، حالىق كوپ شوعىرلاناتىن جەرلەرگە 100-گە جۋىق ساناقتان ونلاين ءوتۋ بۇرىشتارى دايىندالعان.
ساناق پەرسونالى ءۇشىن 155 نۇسقاۋشىلىق ۋچاسكەلەر بەلگىلەنىپ، ولار كەڭسەلىك قۇرال-جابدىقتارمەن، جيھازبەن، تەلەفون بايلانىسى جانە ينتەرنەتپەن قامتىلعان. قالا ورتالىعىنان شالعايدا جاتقان اۋماقتارعا شىعۋ ءۇشىن 14 اۆتوكولىك دايىندالعان.
ساناق ناۋقانىنىڭ ءمانى مەن مازمۇنىن تۇسىندىرۋدە قالا كوشەلەرىنە تاقىرىپتىق 50 بيلبورد پەن 4 تارتپا ورناتىلعان. قوعامدىق ورىندار مەن قوعامدىق كولىكتەرگە بارلىعى 5 مىڭ دانا اقپاراتتىق پاراقشالار ورنالاستىرىلۋدا. تەلەارنالار مەن الەۋمەتتىك جەلىلەردە 11 بەينەروليكتىڭ كورسەتىلىمدەرى ۇيىمداستىرىلۋدا.
پىكىر قالدىرۋ