جامبىلداعى جارىلىستان امان قالعان ءورت ءسوندىرۋشى بايبەك سەمبەكوۆ اسكەري قويماداعى جارىلىستىڭ قالاي باستالعانىن بايانداپ بەردى. ۆيدەو studiya_7tv پاراقشاسىندا جاريالاندى.
بايبەك سەمبەكوۆ تاراز قالالىق ءورت ءسوندىرۋ ءبولىمىنىڭ قاراۋىل باسشىسى. جارىلىس باستالعاندا ول العاشقىلاردىڭ ءبىرى بولىپ اسكەري قويماعا بارعان.
– وقيعا ورنىنا بارعاندا، اسكەريلەردىڭ بىرىنە جولىعىپ، قويمادا نە ساقتالعانىن سۇرادىم. ونىڭ قاتارداعى جاۋىنگەر نەمەسە وفيسەر ەكەنىن بىلمەدىم. جارىلاتىن زات بار ما دەگەندە، قاتتى جارىلاتىن زات جوق دەدى. سودان ءبىز بىردەن سۋ الاتىن جەر ىزدەي باستادىق. ول جەردە سۋ مۇلدەم بولمادى. ءبىز ءمىنىپ كەلگەن كولىكتەردە 5 نەمەسە 8 توننا عانا سۋ بولعان.
ءبىر اسكەري ادام كەلىپ، تانكتەرىندە سۋ جوق ەكەنىن ايتتى. بىزدەگى سۋدى سوعان قۇيۋ كەرەك بولدى. سولاي جاسادىق. بارلىق كولىك ورتكە جاقىندادى. مەن كولىككە وتىردىم، قاسىمدا ءبىر سارباز بولدى. ەندى ءورتتى سوندىرەتىن كەزدە، جارىلىس باستالدى. سودان كولىگىمىز اۋدارىلىپ كەتتى.
قاسىمداعى ەكى ساربازبەن كولىكتىڭ ارتقى جاعىنا وتىردىق. ارى قاراي ناقتى ەسىمدە جوق. بىرەۋ كولىكتىڭ ەسىگىن نەمەسە تەرەزەنى اشتى. بىرەۋلەر ايقايلاپ، جىلاپ جاتتى. كوپ ادام جەردە قان بولىپ جاتتى. مەن سويلەيىن دەسەم، اۋزىم ايەكتەرگە تولىپ قالعان. توقتاۋسىز قان تۇكىرە بەردىم. قاراسام كولىكتىڭ الدىڭعى تەرەزەسى سىنىپ، جوق بولىپ كەتكەن.
سىرتقا شىققاندا، بىرەۋدىڭ كوزى كورمەدى، قۇلاعى ەستىمەدى. بۇل ءبىرىنشى جارىلىس ەدى، 10 مينۋتتان كەيىن ەكىنشى جارىلىس بولدى. ءبارىمىز جەردە جاتتىق. بىرەۋدىڭ اياعى جارالاندى. بارلىعىمىز قالاي امان قالساق دەپ ويلاپ جاتتىق. سودان تاعى ءبىر جارىلىس بولدى دا بىر-بىرىمىزدەن كوز جازىپ قالدىق.
سوسىن تەلەفون ارقىلى ولاردىڭ قايتىس بولعاندارىن ەستىدىم، – دەيدى بايبەك سەمبەكوۆ.
پوسموترەت ەتۋ پۋبليكاسيۋ ۆ Instagram
26 تامىز كۇنى جامبىل وبلىسى بايزاق اۋدانىندا ورنالاسقان اسكەري بولىمدە ساعات 19.00 شاماسىندا قويمالاردىڭ ءبىرىنىڭ جانىندا ءورت شىققان. ءورت سالدارىنان قويماداعى ءوق-دارى جارىلىپ، سالدارىنان 15 ادام قازا تاپقان. ولاردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. اسكەري بولىمنەن جارتى شاقىرىم جەردەگى قاينار اۋىلىنداعى ۇيلەر بۇلىنگەن.
جارىلىستان قازا تاپقانداردىڭ تولىق ءاتى-جونى:
ەفرەيتور ر.س.جانبولاتوۆ – 40 جاستا
سەرجانت م.س.مەرشىمباي – 40 جاستا
ستارشينا ە.ە.نادىربەكوۆ – 41 جاستا
ازاماتتىق قىزمەتكەر و.د.دالىبايەۆ – 59 جاستا
وڭتۇستىك ءوڭىردىڭ اسكەري پروكۋرورى ا.ق.قاپەزوۆ – 44 جاستا
سەرجانت-ورت ءسوندىرۋشى ا.س.تەمىربولاتوۆ – 28 جاستا
پولكوۆنيك م.ك.ايمانوۆ – 45 جاستا
پودپولكوۆنيك ا.ن.ميكروپۋلو – 50 جاستا
سەرجانت، اعا ءورت قۇتقارۋشىسى ە.ق.ساندىبايەۆ – 30 جاستا
سەرجانت، اعا ءورت قۇتقارۋشىسى ت.ق.تورەبەكوۆ – 40 جاستا
مايور س.ج.الىمبەكوۆ – 36 جاستا
مايور، قاراۋىل باسشىسى س.ۆ.زايكين – 41 جاستا
اعا سەرجانت، جۇرگىزۋشى گ.ج.قۋاتبەك – 26 جاستا
كىشى سەرجانت، ءورت قۇتقارۋشىسى ءا.ق.ادىلبەك – 25 جاستا
قاتارداعى ءورت ءسوندىرۋشى ءا.ب.كەڭەس – 22 جاستا
پىكىر قالدىرۋ