شىمكەنت قالاسىنا كەلۋشى قوناقتار ءۇشىن ىڭعايلى جانە جايلى جاعداي جاساۋ ماقساتىنداعى جۇمىستار جۇيەلى ىسكە اسۋدا. بيىلعى جىلدىڭ مامىر ايىندا تۋريزم جانە سىرتقى بايلانىستار باسقارماسى مەن «Kazakh Tourism» ۇلتتىق كومپانياسى اراسىنداعى ەكىجاقتى كەلىسىم اياسىندا «eQonaq» ءبىرىڭعاي اقپاراتتىق جۇيەسى قوناق ۇيلەردە ورناتىلعان بولاتىن.

اقپاراتتىق جۇيە ارقىلى مەگاپوليسكە كەلگەن تۋريستەر ەرتەرەكتە اتقارىلعانداي كوشى-قون پوليسياسىنا بارىپ نەمەسە «ەگوۆ» پورتالىنا كىرىپ ۋاقىت جوعالتپاي، وزدەرى توقتاعان قوناق ۇيدە قىزمەتكەرلەردىڭ كومەگىمەن نەمەسە ءوز ىقپالىمەن تىركەلە الادى. بۇل تۋريستەردى ەسەپكە الۋ، تۋريستىك اعىندى تالداۋ جانە كوشى-قون باقىلاۋىن جۇزەگە اسىرۋعا ارنالعان جۇيە. بۇگىنگى كۇنگە دەيىن بازادا 40 مىڭعا جۋىق شەتەل ازاماتى تىركەلگەن.

جالپى شىمكەنتتە 120 ورنالاستىرۋ ورنى بار. ونىڭ جەتپىسىندە، اتاپ ايتساق، قوناق ۇيلەر، حوستەلدەر جانە دەمالىس ۇيلەرى تاجىريبەدە قولدانىپ كەلەدى. جىل سوڭىنا دەيىن بارلىق نىسانعا «eQonaq» ءبىرىڭعاي اقپاراتتىق جۇيەسىن ورناتۋ جوسپارلانعان.