حالىقتىڭ ءومىر ءسۇرۋ ساپاسىن جاقسارتۋ ماقساتىندا شاعىن اۋدانداردى تازا اۋىز سۋمەن جابدىقتاۋ ماسەلەسى قالا اكىمىنىڭ كۇن تارتىبىندەگى باستى مىندەت بولىپ وتىر. «نۇرلى جەر» مەملەكەتتىك باعدارلاماسى اياسىندا 2023 جىلى حالىقتى 100% تازا اۋىز سۋمەن قامتاماسىز ەتۋ جوسپارلانۋدا. وسى مەجەگە قول جەتكىزۋ ءۇشىن ەلدى مەكەندەرگە ءتيىستى ينفراقۇرىلىمدى جەتكىزۋ بويىنشا ناقتى جوسپار بەكىتىلىپ، جۇمىستار جۇرگىزىلۋدە.

ايتا كەتەيىك، بۇگىنگى تاڭدا قالا تۇرعىندارىن ورتالىقتاندىرىلعان سۋمەن جابدىقتاۋ كورسەتكىشى 95،6%-دى قۇرايدى. ياعني، قالاداعى 81 ەلدى مەكەننىڭ بەسەۋى كەستەمەن، جەتەۋى تاسىمالدى اۋىز سۋمەن، ال 69-ى ساپالى اۋىز سۋمەن قامتاماسىز ەتىلگەن.

وسى جىلى 3 ماگيسترالدى سۋاققى، تاسىمالدى سۋدى پايدالاناتىن 7 ەلدىمەكەن جانە اۋىز سۋ كەستەمەن بەرىلەتىن 2 ەلدىمەكەننىڭ قۇرىلىسى اياقتالىپ، 25،6 مىڭ ادام ساپالى اۋىز سۋعا قول جەتكىزەدى. ناتيجەسىندە، قامتىلۋ كورسەتكىشى 98 پايىزعا وسەدى.

شىمكەنت قالاسىنىڭ سولتۇستىك باتىس بولىگىندە ورنالاسقان ەلدىمەكەندەردى اۋىز سۋمەن قامتۋ ماقساتىندا جالپى ۇزىندىعى 30 شاقىرىمنان استام بولاتىن ءۇش ماگيسترالدى سۋاققىنىڭ قۇرىلىسى جۇرگىزىلىپ جاتىر.

اتالعان ماگيسترالدى سۋ قۇبىرىنىڭ قۇرىلىسى اياقتالسا اسار-2، دوستىق، سولتۇستىك ساياجاي، ىنتىماق، ىنتىماق-2، باتىس، قىزىلجار، يگىلىك، جاڭاتالاپ، تاۋەلسىزدىككە 20 جىل، كوكبۇلاق تۇرعىن الاپتارى، ياعني وندا تۇراتىن 50 مىڭعا جۋىق تۇرعىن تولىققاندى ساپالى اۋىز سۋمەن قامتاماسىز ەتىلەدى دەپ جوسپارلانۋدا.

بۇل باعىتتاعى جۇمىستار جالعاسىن تاۋىپ الداعى جىلدارى قالا تۇرعىندارى تىرشىلىك نارىمەن تولىق قامتىلاتىن بولادى.