بۇگىن جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتەن تىس سەگىزىنشى سەسسياسى ءوتتى. سەسسيانىڭ كۇن تارتىبىندە 6 ماسەلە قارالىپ، بەكىتىلدى.

سەسسيا جۇمىسىنا قالا اكىمى مۇرات ايتەنوۆ قاتىستى. جيىن بارىسىندا قالا اكىمدىگىنىڭ قىزمەتىنە قاتىستى سالالار بويىنشا الەۋمەتتىك ءمانى بار قوعامدىق كولىك قاتىناستارىنىڭ تىزبەسىنە قوسىمشا مارشرۋتتار ەنگىزۋ ماسەلەسى قارالىپ، باعانى تۇراقتاندىرۋ باعىتىندا اتقارىلعان جۇمىستاردىڭ ەسەبى تىڭدالدى. سونداي-اق مەكتەپتەر مەن مەكتەپكە دەيىنگى ءبىلىم بەرۋ ۇيىمدارىنداعى ءبىلىم ساپاسى ماسەلەسى تالقىلاندى.

جيىن بارىسىندا ءسوز العان قالا باسشىسى، سەسسيا جۇمىسىندا قالا ءۇشىن ماڭىزدى شەشىمدەر قابىلدانعاندىعىن اتاپ ءوتتى. ونىڭ ىشىندە جولاۋشىلار تاسىمالىندا الەۋمەتتىك ءمانى بار قوسىمشا 7 اۆتوبۋس مارشرۋتتارىنىڭ اشىلۋى قوعامدىق كولىك سالاسىن جۇيەلەندىرۋ جۇمىستارىنىڭ ناتيجەسىندە ىسكە اسقاندىعىن مالىمدەدى. بۇعان دەيىن 57 باعىت بويىنشا الەۋمەتتىك مارشرۋتتار تۇزىلسە، بۇگىن ولاردىڭ سانى 64-كە جەتكەندىگىن حابارلادى. مارشرۋتتار جۇيەسىن قالىپتاستىرۋدا دەپۋتاتتار تاراپىنان بىلدىرىلگەن سىن-ەسكەرتپەلەر نازارعا الىنىپ، ولار بويىنشا وڭتايلى شەشىمدەر قابىلداناتىنىن جەتكىزدى.

قوعامدىق كولىك قاتىناسىمەن بارلىق 81 ەلدى مەكەندى قامتۋ بويىنشا جۇيەلى جوسپار تۇزىلگەندىگىن، ونىڭ ورىندالۋ كورسەتكىشى 82 پايىز بولىپ وتىرعاندىعىن ايتتى.

باعانى تۇراقتاندىرۋ بويىنشا مەملەكەت باسشىسىنىڭ تاپسىرماسى بار ەكەندىگىن نازارعا العان قالا اكىمى، الەۋمەتتىك ماڭىزى بار ازىق-تۇلىك تاۋارلارى باعالارىنىڭ وسۋىنە جول بەرمەۋ باعىتىندا ناقتى جۇمىستار اتقارىلىپ وتىر دەدى. ونىڭ ىشىندە ءىرى جەلىلىك ساۋدا ورتالىقتارىنا قايتارىمدى اينالىم قاراجاتى بەرىلىپ، الەۋمەتتىك ءمانى بار ازىق-تۇلىك تاۋارلارىنا باعا تۇراقتىلىعى قامتاماسىز ەتىلگەن. بۇل ماقساتقا بولىنەتىن قاراجات جىلدان-جىلعا ارتا بەرەتىنىن اتاپ ءوتتى.

قالا كولەمىندە ءبىلىم سالاسىنا ەرەكشە كوڭىل ءبولىنىپ جاتقاندىعىن ايتقان قالا باسشىسى، بۇل ماسەلەدە ءماسليحات دەپۋتاتتارى تاراپىنان ۇلكەن قولداۋ بوپ جاتقاندىعىن ايتتى. ءبىلىم ساپاسىن ارتتىرۋدا ماقساتتى جۇمىستار جۇيەلى تۇردە اتقارىلا بەرەتىنىنەن سەنىم ءبىلدىردى.

قالا اكىمى وسى ساناتتاعى ماڭىزدى ماسەلەلەر بويىنشا قولداۋ بىلدىرگەن ءماسليحات دەپۋتاتتارىنا ءوز العىسىن ايتا وتىرىپ، دەپۋتاتتىق كورپۋس وكىلدەرىن كەلە جاتقان قازاقستان رەسپۋبليكاسىنىڭ كونستيتۋسياسى كۇنىمەن قۇتتىقتادى.

جيىن سوڭىندا مۇرات ايتەنوۆ رەسەيدىڭ ۋفا قالاسىندا وتكەن ەركىن كۇرەستەن الەم چەمپيوناتىنىڭ قولا جۇلدەگەرى بەكزات ەرمەكبايەۆتى ورتاعا شاقىرىپ، ارنايى قۇتتىقتادى.