كەشە، 26 تامىز كۇنى كەشكىسىن «شىمكەنتسيتي» شاعىن اۋدانىنىڭ 30 شاقتى تۇرعىنى جولدى جاۋىپ، گاز بەرىلۋىن تالاپ ەتتى.

وقيعا ورنىنا قالالىق ەنەرگەتيكا جانە ينفراقۇرىلىمدى دامىتۋ، قۇرىلىس باسقارمالارىنىڭ، قاراتاۋ اۋدانى اكىمدىگىنىڭ جانە «قۋاتجىلۋ» مەكەمەسىنىڭ جاۋاپتى وكىلدەرى بارىپ، نارازى توپپەن كەزدەستى، ماسەلەنى جان-جاقتى ءتۇسىندىردى. جاعداي رەتتەلىپ، جول قوزعالىسى قالپىنا كەلتىرىلدى.

قالانىڭ سولتۇستىك بولىگىن، ونىڭ ىشىندە «شىمكەنتسيتي» شاعىن اۋدانىن تابيعي گازبەن قامتۋ ماسەلەسى ءبىرىنشى كەزەكتە اتقارىلۋى ءتيىس جۇمىستاردىڭ تىزىمىنە ەنگەن. جۇمىس تارتىبىنە سايكەس، گاز جۇيەلەرىن جۇرگىزۋدىڭ جوبالىق-سمەتالىق قۇجاتتارى ازىرلەنىپ، مەملەكەتتىك ساراپتاما قورىتىندىسى الىنعان. جوبا قارجىلاندىرۋ جوسپارىنا ەنىپ، بىرنەشە كەزەڭدى قامتيتىن قۇرىلىس-مونتاجداۋ جۇمىستارى اياقتالدى.

جوبانىڭ قۇرىلىمىندا ەڭ نەگىزگى جانە اۋقىمدى جۇمىس كولەمى - N3 اۆتوماتتاندىرىلعان گاز تاراتۋ ستانسياسى (اگرس) مەن ماگيسترالدى گاز قۇبىرلارىن تارتۋ قۇرىلىستارىنا تيەسىلى. ىشكى ورامدىق گاز جۇيەلەرىن تارتىپ، ورتالىق جۇيەگە قوسۋ - قۇرىلىستىڭ ەڭ سوڭعى ساتىسىندا اتقارىلاتىن ءىس.

نەگىزىندە، جوسپار بويىنشا گاز تاراتۋ ستانسياسىنىڭ قۇرىلىسى 2022 جىلى اياقتالۋى ءتيىس بولاتىن. قالا اكىمدىگى اتالعان جوبانىڭ ماڭىزدىلىعىن ەسكەرە كەلە جۇمىستاردى جەدەلدەتىپ، جوبانى مەرزىمىنەن بۇرىن ىسكە قوسۋ جونىندە باستاما كوتەرگەن-دى. قازىرگى تاڭدا گاز تاراتۋ ستانسياسى مەن ماگيسترالدى گاز قۇبىرىنىڭ قۇرىلىسى تولىق اياقتالدى. تەحنيكالىق تالاپتارعا سايكەس سىناما جۇمىستارى اتقارىلۋدا. ستانسيا مەن ماگيسترالدىق جەلىلەر قاۋىپتىلىگى جوعارى نىساندار ساناتىنا جاتاتىندىقتان، قازىرگى كەزدە لابوروتوريالىق جانە تەحنيكالىق قاداعالاۋ سىناقتارىنان وتكىزىلۋدە.

قۇرىلىسى بيىلعى جىلى اياقتالۋى ءتيىس بارلىق تابيعي گاز نىساندارى جىلىتۋ ماۋسىمىنا دەيىنگى مەرزىمدە ىسكە قوسۋ ماسەلەسى قالا اكىمىنىڭ تىكەلەي باقىلاۋىندا.