شىمكەنت قالاسىنىڭ تۇرعىنى زارينا كەنشىنبايەۆا – «ەڭبەك» مەملەكەتتىك باعدارلاماسىنىڭ شەڭبەرىندە بيىل 3 ايلىق كاسىپتىك وقۋ كۋرسىنا جولدانعان باعدارلاما قاتىسۋشىلارىنىڭ ءبىرى. ول ءقازىر «ءمولدىر» وقۋ ورتالىعىندا «تىگىنشى» ماماندىعى بويىنشا ءبىلىم الۋدا.

مەن بالا كۇتىمىمەن ءبىراز جىل جۇمىسسىز ۇيدە وتىرۋىما تۋرا كەلدى. الەۋمەتتىك جەلىدەن قىسقا مەرزىمدى كاسىپتىك وقىتۋ كۋرسىنىڭ باستالاتىنىن ەستىپ، مامىر ايىندا جۇمىسپەن قامتۋ ورتالىعىنا بارىپ قۇجات تاپسىردىم. قازىرگى تاڭدا تىگىنشى ماماندىعى بويىنشا ءبىلىم الىپ، مۇنداعى تاجىريبەلى شەبەرلەردىڭ ارقاسىندا كوپ نارسە ۇيرەندىم. قولىمنان بالالارعا ارنالعان كيىم-كەشەك، قازاقي ناقىشتاعى قىز جاساۋى، پەردە تاعى دا باسقا ءتۇرلى دۇنيەلەردى جاساۋ كەلەدى. الداعى ۋاقىتتا كۋالىكتى العان سوڭ، ءوزىمنىڭ جەكە كاسىبىمدى اشسام دەگەن نيەتىم بار، – دەيدى كوپ بالالى انا.

بيىل جۇمىسپەن قامتۋ ماسەلەلەرى جونىندەگى وڭىرلىك كوميسسياسىنىڭ شەشىمىمەن 600 ادام جۇمىس بەرۋشىلەردىڭ سۇرانىسىنا سايكەس، 8 ماماندىق بويىنشا 11 ءبىلىم بەرۋ ۇيىمىنا جانە 1 900 ادام 24 ماماندىق بويىنشا 18 ءبىلىم بەرۋ ۇيىمىنا وقۋعا جولداندى. ال، ەڭبەك نارىعىنىڭ سۇرانىسىنا سايكەس 30-دان استام قاجەتتى ماماندىقتار بويىنشا 2500 ازامات 3 اي مەرزىمگە وقۋعا جولداما الدى.

قاتىسۋشىلارعا اي سايىن 17 مىڭ تەڭگە كولەمىندە شاكىرتاقى تولەنەدى. وقۋ اياقتالعان سوڭ ارنايى سەرتيفيكات بەرىلەدى. سونىمەن قاتار، وقۋىن اياقتاعان ازاماتتاردى ەڭبەك نارىعىنىڭ سۇرانىسىنا سايكەس بوس جۇمىس ورىندارىنا جۇمىسقا ورنالاسۋىنا ىقپال ەتىلەتىن بولادى. بىلتىر 2000-عا جۋىق ادام قىسقا مەرزىمدى كاسىپتىك وقىتۋدى ءبىتىرىپ، ناتيجەسىندە 1590 ادام جۇمىسپەن قامتىلعان.

«ەڭبەك» مەملەكەتتىك باعدارلاماسى جۇمىسسىز ازاماتتاردىڭ سانىن ازايتۋ، تۇرعىنداردىڭ بىلىم-بىلىكتىلىگىن كوتەرۋ، ەڭبەككە ىنتالاندىرۋدى ماقسات ەتكەن. قازىرگى تاڭدا ازاماتتاردى جۇمىسپەن قامتۋ ماقساتىندا قولداۋ شارالارى جەتكىلىكتى. تۇرعىندار اتاۋلى الەۋمەتتىك كومەكتىڭ اياققا تۇرىپ كەتۋ ءۇشىن بەرىلەتىن ۋاقىتشا جاردەم ەكەنىن ۇعىنۋى ءتيىس. سول سەبەپتى ازاماتتاردىڭ مەملەكەتتىك باعدارلامالارعا قاتىسىپ، ءوز ءبىلىمىن جەتىلدىرىپ، كاسىپ اشۋعا ۇمتىلۋدىڭ ماڭىزى زور.