مەملەكەت باسشىسى اباتتاندىرۋ جانە تۇرعىن ۇي-كوممۋنالدىق شارۋاشىلىقتا «حالىق قاتىساتىن بيۋدجەتتىڭ» ۇلەسىن 10 ەسە ارتتىرۋدى تاپسىردى.

شىمكەنت قالاسىندا بۇل جوبا بيىلدان باستاپ جۇزەگە اسىپ، تيىمدىلىگىن كورسەتتى. بيۋدجەت جوسپارى باستاپقى 287 ملن تەڭگەدەن 1،5 ملرد تەڭگەگە جۋىق ارتىپ، بەس ەسە ءوستى. تۇرعىنداردىڭ قاتىسۋىمەن اباتتاندىرۋ بويىنشا 66 جوبا ىرىكتەلىپ، ىسكە اسىرىلۋدا.

كەلەسى جىلى جوباعا قارالاتىن قارجى 10 ەسەگە ارتىپ، 3 ملرد. تەڭگەگە جەتەدى. اۋدان اكىمدىكتەرى وسى ايدان باستاپ تۇرعىنداردان ۇسىنىستار جيناقتاپ، ىرىكتەيدى.

تۇرعىندار اۋدان اكىمى اپپاراتى قۇزىرەتىنە كىرەتىن سالالالار بويىنشا تالاپ-ۇسىنىستارىن جىبەرۋىنە مۇمكىندىگى بار. ماسەلەن، اۋماقتى كوگالداندىرۋ، اياقجولداردى جايلاستىرۋ، پاندۋستاردى، ارىقتاردى سالۋ جانە جوندەۋ، ت.ب.، ماسەلەلەر بويىنشا ۇسىنا الادى. جوباعا اۋداندا تىركەلگەن كەز كەلگەن ازامات قاتىسا الادى. ول ءۇشىن open-shymkent.kz ارنايى ينتەرنەت-رەسۋرسىنا تىركەلۋىڭىز قاجەت.

جوبانىڭ تالاپتارىنا سايكەس، ەكى اپتا ىشىندە جيناقتالعان ۇسىنىستار اۋدان اكىمدىگى تاراپىنان قۇرىلعان ساراپتامالىق كەڭەسكە ۇسىنىلادى. ساراپتامالىق كەڭەس جوبالار تىزبەسىن ىرىكتەپ، داۋىس بەرۋ ءۇشىن سايتقا ورنالاستىرادى. داۋىس بەرۋ ناتيجەلەرى بويىنشا كوپ داۋىس جيناعان جوبالار اۋدان اكىمدىگى ارقىلى جۇزەگە اسىرىلاتىن بولادى.

اشىقتىق پەن جاريالىققا نەگىزدەلگەن «حالىق قاتىساتىن بيۋدجەت» - بيلىكتى بۇقاراعا بارىنشا جاقىنداتۋدىڭ ءتيىمدى قۇرالى. جوبانى قالانىڭ كوممۋنالدىق شارۋاشىلىعىندا دا كەڭىنەن ەنگىزىلەتىن بولادى.