شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن ينۆەستيسيا جونىندەگى شتابتىڭ كەزەكتى وتىرىسى ءوتتى. جيىندا جاڭا ينۆەستيسيالىق جوبالار ۇسىنىلىپ، 8 ايدىڭ قورىتىندىسى بويىنشا نەگىزگى كاپيتالعا سالىنعان ينۆەستيسيا كولەمى جانە حاتتامالىق تاپسىرمالاردىڭ ورىندالۋ بارىسى تالقىلاندى.

جيىندا «Zoom» جۇيەسى ارقىلى جەكە كاسىپكەرلەر جاڭا جوبالارىن ۇسىندى. اۆتوموبيل، قۇرىلىس، مەديسينا سالاسى بويىنشا وندىرىستىك كاسىپورىندار، ساۋدا، الەۋمەتتىك نىساندار جانە كوپقاباتتى تۇرعىن ءۇي باعىتىندا، جالپى 13 جوبا تانىستىرىلدى.

اتاپ ايتقاندا، ءۇندىستاندىق «ماننات حەلتكەار» ج ش س اۆتوموبيل قوسالقى بولشەكتەرى ءوندىرىسى، بيواكتيۆتى قوسپالار ءوندىرىسىن، يراندىق «KHZ EXPO-777» ج ش س بازالت تالشىقتان وتقا ءتوزىمدى ماتا ءوندىرۋ، تۇركيالىق «وزديل» ج ش س كومپانياسى وكىلدەرى گازوبلوك ءوندىرىسى جوباسىن جۇزەگە اسىرۋعا نيەتتى ەكەنىن جەتكىزدى.

ودان بولەك، «Lotos Trade» ج ش س بوياۋ ماتەريالدارى، «UnitPacking» ج ش س قاعاز جانە گوفروكارتون ءوندىرىسى، «بەكناز ي ك» ج ش س قۇرساي شاعىناۋدانىندا 500 ورىندىق مەكتەپ، «اي-ارۋ» ج ش س UEFA تالاپتارىنا ساي ەكى فۋتبول الاڭىن سالۋ، «ارنات ينۆەست» ج ش س «شىمكەنت سيتي» شاعىناۋدانىندا زاماناۋي ساۋدا-ويىن-ساۋىق ورتالىعى، «مەيرام» ج ش س كينوستۋديا جوباسىن ۇسىندى.

سونىمەن قاتار، «Integra Construction KZ» ج ش س، «01KZ-Building» ج ش س، «NTR» ج ش س كوپقاباتتى تۇرعىن ءۇي قۇرىلىسىن سالۋعا قىزىعۋشىلىق تانىتىپ وتىر.

ءار جوباعا جەكە توقتالىپ وتكەن قالا باسشىسى، تۋىنداعان جانە تۋىنداۋى مۇمكىن دەگەن ماسەلەلەردىڭ ۋاقىتىلى شەشىمى ءۇشىن ءتيىستى سالا باسشىلارىنا ناقتى تاپسىرمالار بەردى. ءار جوباعا بارىنشا كومەك كورسەتىلەتىنىن، جەر تەلىمى جانە ينفراقۇرىلىم سەكىلدى ماسەلەلەر شەشىمىن تاباتىنىن ايتا كەلە، كاسىپكەرلەرگە العىسىن ءبىلدىردى.