شىمكەنتتەگى قالالىق ستوماتولوگيالىق ەمحانا - تەگىن مەديسينالىق كومەكتىڭ كەپىلدەندىرىلگەن كولەمىنە سايكەس 0-دەن 18 جاسقا دەيىنگى بالالار مەن جۇكتى ايەلدەرگە ارنالعان ارنايى ستوماتولوگيالىق كومەك كورسەتەتىن قالاداعى جالعىز مەملەكەتتىك مەكەمە.

ەمحانادا بالالارعا ارنالعان ارنايى ستوماتولوگيالىق كومەكتىڭ بارلىق تۇرلەرى كورسەتىلەدى. اتاپ ايتساق: نانوتەحنولوگيالىق ادىستەر، 4-6 بۋىننىڭ بىتەمە ماتەريالدارى مەن زاماناۋي ەندودونتيالىق ادىستەر قولدانىلادى. سونىمەن قاتار، ءتىستى جۇلۋ كەزىندە جاڭا انەستەتيكتەردى پايدالانۋ ارقىلى اۋىرتپاي ەمدەۋگە مۇمكىندىك بار.

بۇدان بولەك، حيرۋرگيالىق وتالاردىڭ بارلىق تۇرلەرى جۇرگىزىلەدى. زاماناۋي رەنتگەندىك زەرتتەۋ كەزىندە پانورامالىق رەنتگەنوگرافيا مەن فيزيوتەراپيەۆتىك ەمدەۋ ادىستەرى قولدانىلادى. الەۋمەتتىك جاعدايى تومەن وتباسى مۇشەلەرىنە ورتودونتەنتيالىق پلاستيكا تەگىن جاسالادى.

مەديسينالىق مەكەمە ءبىر اۋىسىمدا 250 ادامدى قابىلداي الادى. ەمحانانىڭ تەراپيالىق ستوماتولوگيا، حيرۋرگيالىق ستوماتولوگيا، الدىن –الۋ، اقىلى ءبولىمى بار. سونداي-اق، تۋا بىتكەن جاق-بەت ايماعى اۋىتقۋلارى اۋرۋلارى بويىنشا ساۋىقتىرۋ ورتالىعى جۇمىس جاسايدى.

ەلەكتروندى قۇجات اينالىمى تولىعىمەن سيفرلاندىرىلعان. وسى جىلدىڭ سەگىز ايىندا 40 مىڭنان اسا كەلۋشىگە 84 مىڭ ستوماتولوگيالىق اۋرۋ بويىنشا كومەك كورسەتىلگەن. ەمحانا ازاماتتارعا تاۋلىك بويى قىزمەت كورسەتەدى.