شىمكەنت قالاسىنىڭ اكىمى مۇرات ايتەنوۆتىڭ كەزەكتى تىكەلەي ەفيرى جول قۇرىلىسى سالاسىنا ارنالدى. ادەتتەگىدەي تارتىپپەن ەفير قالاداعى ەپيدەميولوگيالىق جاعدايدى بايانداۋدان باستالدى. سوڭعى تاۋلىكتەگى جاعداي بويىنشا COVID-19 ينفەكسياسى قالانىڭ 160 تۇرعىنىنان انىقتالىپ، دەرت جۇقتىرعاندار ستاتيستيكاسى 37 822 ادامعا جەتكەن. جاعداي ءبىرشاما تۇراقتالعانىمەن، تۇرعىندارعا ۆاكسينا سالۋ جۇمىستارى باسەڭدەگەن جوق.

تىكەلەي جەلىنىڭ نەگىزگى تاقىرىبىنا كوشكەن قالا اكىمى مەملەكەت باسشىسى قازاقستان حالقىنا ارناعان بيىلعى جولداۋىندا ەلىمىزدىڭ ىشكى بايلانىسىن جاقسارتۋدا كولىك ينفراقۇرىلىمنا قاتىستى ناقتى تاپسىرمالار جۇكتەگەنىن اتاپ ءوتتى.

اۆتوموبيل جولدارى قالا ەكونوميكاسىنىڭ ماڭىزدى سەكتورى ەكەنىن نازارعا العان مۇرات دۇيسەنبەك ۇلى، جول ساپاسىن ارتتىرۋدا ناقتى كورسەتكىشتەر بەلگىلەنىپ، ىسكە اسىپ وتىرعاندىعىن جەتكىزدى.
بۇگىنگى تاڭدا شىمكەنت قالاسىنداعى جولداردىڭ جالپى ۇزىندىعى 3247 شاقىرىمدى قۇرايدى. بيىل جاقسى جانە قاناعاتتانارلىق جاعدايداعى جولداردىڭ ۇلەسىن 63،6 پايىزعا جەتكىزۋ جوسپارلانعان.

رەسپۋبليكالىق قالا مارتەبەسىن العان 2018 جىلى بۇل كورسەتكىش 53 پايىزدى قۇراعان. قالا اكىمى وسى جىلدار ىشىندە كولىك جولدارىنىڭ ساپاسىن ارتتىرۋعا ايرىقشا ءمان بەرىلىپ، سالاعا بولىنگەن قاراجات پەن جۇمىس كولەمى ەسەلەپ ارتقانىن مالىمدەدى. سوڭعى ءۇش جىلدا قالا بويىنشا 850 شاقىرىمنان استام جول توسەلگەنىن ايتتى.

اتاپ ايتقاندا، 2018 جىلى 4،1 ملرد تەڭگە قارالىپ، 222،6 شاقىرىم بولاتىن 112 نىساندا جول قۇرىلىسى، جوندەۋ جۇمىستارى جۇرگىزىلسە، 2020 جىلى 416،8 شاقىرىم بولاتىن 261 جول نىسانى قامتىلىپ، 21،9 ملرد. تەڭگە قارجى بولىنگەن. بيىلعى جىلى 311،3 شاقىرىم بولاتىن 182 جول نىساندارىندا قۇرىلىس-جوندەۋ جۇمىستارىن جۇرگىزۋگە 34،8 ملرد. تەڭگە قارالدى. ونىڭ ىشىندە اۋقىمدى جوبالار – ا-2 اينالما جولىنىڭ كەزەڭدىك جۇمىستارى، قونايەۆ داڭعىلى جالعاسىنىڭ قۇرىلىسى، قونايەۆ-رىسقۇلوۆ كوشەسىندە جولايرىق قۇرىلىستارى قامتىلعان.

بيىلعى جوسپار بويىنشا قالا اۋداندارىندا 71 كوشە كۇردەلى جوندەۋدەن وتكىزىلىپ وتىرسا، ورتاشا جوندەۋمەن 9 ماگيسترالدى جانە 151 ىشكى ورامدىق كوشەلەر قامتىلعان. جىل سوڭىنا دەيىن 270 شاقىرىمنان استاتىن 169 نىسان پايدالانۋعا بەرىلمەك. شاعال تاس توسەۋ جۇمىستارى 157 شاقىرىمدىق 277 كوشەدە جوسپارلانىپ، اتقارىلۋدا. جەر استى ينفراقۇرىلىم جەلىلەرى تارتىلعان اۋماقتاردىڭ جولدارىنا تاس توسەۋ ءۇشىن قوسىمشا 500 ملن. تەڭگە قاراستىرىلعان.

قالا باسشىسى ەفير بارىسىندا ا-2 اينالما جولىنىڭ قۇرىلىس بارىسى، جولايرىق قۇرىلىستارى، قونايەۆ داڭعىلىنىڭ جالعاسى جوبالارى بويىنشا اتقارىلىپ جاتقان جۇمىستار بويىنشا ماعلۇمات بەرىپ، جول قوزعالىسىنىڭ قاۋىپسىزدىگىن قامتاماسىز ەتۋ باعىتىنداعى باستامالار جونىندە كەڭىنەن توقتالدى.

تىكەلەي ەفيردە شاھار باسشىسى تۇرعىنداردىڭ ساۋالدارىنا جاۋاپ بەرىپ، جول سالاسىنداعى ءاربىر نىسانعا جەكە-دارا توقتالدى.