قازاقستاندا قىركۇيەكتىڭ ەكىنشى جەكسەنبىسى – وتباسى كۇنى. وسىعان وراي بۇگىن شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ «ازاماتتىق حال اكتىلەرىن تىركەۋ بولىمىندە» ءبىر اي بۇرىن نەكەگە تۇرۋعا ءوتىنىش بىلدىرگەن 37 جۇپتى تىركەدى. بۇل تۋرالى احات ءبولىمىنىڭ باسشىسى اكبوتا قارناكبايەۆا مالىمدەدى.

احات ءبولىمى مەرەكە قارساڭىندا شاڭىراق كوتەرگەن التى جۇپقا نەكە قيۋ كۋالىگىن سالتاناتتى جاعدايدا تاپسىردى. نەكەلەرىن قيىپ كۋالىك العان بۇل وتباسىلارعا گۇل شوعى مەن سىيلىقتار تابىستالدى.

نەكەسىن قيعان جۇپتىڭ ءبىرى – قالا تۇرعىنى ايان مەن اقمارال. بۇعان دەيىن ولار 1 جىلداي ارالاسىپ، بىر-بىرىمەن كوڭىل جاراستىرعان. قازىردە جاس وتباسى اتا-اناسىمەن بىرگە تۇرادى. بولاشاقتا باسپانا كەزەگىنە قۇجات تاپسىرۋدى جوسپارلاپ وتىر.

سونىمەن بىرگە جاس جۇبايلارعا وتباسى قۇندىلىقتارى ءتۇسىندىرىلىپ، ىرگەسى بەرىك، جاراسىمدى جانۇيا قالىپتاستىرۋ جايى ناسيحاتتالدى.

اكبوتا قارناكبايەۆانىڭ ايتۋىنشا، وتكەن جىلدىڭ سەگىز ايىمەن سالىستىرعاندا وتباسى قۇرعاندار سانى ەكى مىڭعا ارتىپ، جىل باسىنان بەرى 5 مىڭنان اسا نەكە قيىلعان.

شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ «ازاماتتىق حال اكتىلەرىن تىركەۋ» ءبولىمى 8 ءتۇرلى مەملەكەتتىك قىزمەت تۇرلەرىن كورسەتەدى. قىزمەتتەردى ۇيدەن شىقپاي-اق، ونلاين تۇردە الۋعا جاعداي جاسالعان. سيفرلىق جۇيە ارقىلى نەكەگە تۇرۋعا ءوتىنىش بەرگەن جۇپ احات بولىمىنە ءبىر ايدان كەيىن قۇجاتتارىن الۋعا عانا كەلەدى.