بۇگىن قالاداعى ەمحانالاردا تۇماۋعا قارسى ۆاكسينالاۋ جۇمىستارى باستالدى. بۇل تۋرالى شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ مالىمدەدى. باسقارما باسشىسى قالا اكىمدىگىنىڭ Instagram پاراقشاسىندا وتكەن تىكەلەي ەفيردە اتقارىلعان جۇمىستاردى قورىتىندىلاپ، تۇرعىندار ساۋالىنا جاۋاپ بەردى.

ەكپە ەگۋ جۇمىستارى ءۇشىن بيىل قالا تۇرعىندارىنا 128 963 دوزا ۆاكسينا ساتىپ الىندى. بۇعان قوسا قوسىمشا 109 432 دوزاعا ءوتىنىش بەرىلگەن.

سونداي-اق باسقارما باسشىسى قالاداعى ەپيدەميولوگيالىق جاعدايعا توقتالىپ ءوتتى.

– شىمكەنت قالاسى بويىنشا وتكەن تاۋلىكتە كۆي-دىڭ 128 جاعدايى تىركەلدى. ونىڭ ىشىندە بەلگىلەرى بار - 101، بەلگىلەرى جوق - 27. ىندەت جۇقتىرعان 73 ادام ينفەكسيالىق ستاسيونارعا جاتقىزىلىپ، 55 ادام ءۇي باقىلاۋىنا الىندى. شىمكەنتتە ىندەتكە شالدىققاندار كۇن سايىن ازايىپ كەلەدى. سونىڭ دالەلى، قالاداعى پروۆيزورلىق ستاسيونارلارداعى توسەك-ورىنداردىڭ 50 پايىزدان استامى بوسادى. ناقتىراق ايتقاندا، 4 350 توسەك-ورىننان 2 397ء-ى قىسقارعان. ەپيدەميولوگيالىق جاعداي تۇراقتالىپ كەلەدى، – دەدى ب. پوزيلوۆ.

باسقارما باسشىسىنا تىكەلەي ەفير بارىسىندا نەگىزىنەن ەمحاناداعى تەكسەرۋلەر، بالالار اراسىنداعى ينفەكسيالىق اۋرۋدىڭ تارالۋى مەن مەديسينا قىزمەتكەرلەرىنىڭ جالاقىسى جونىندە ساۋالدار جولداندى.

ايتا كەتەيىك، تۇماۋعا قارسى ۆاكسينانىڭ كوروناۆيرۋس ينفەكسياسىنا مۇلدەم قاتىسى جوق. باسقارما باسشىسى بۇل يممۋنداۋ جۇمىستارى ماۋسىمدىق تۇماۋدى الدىن الۋ ءۇشىن جىلدا جۇرگىزىلەتىن پروفيلاكتيكالىق شارا ەكەنىن اتاپ ءوتتى.