جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتى توعىزىنشى سەسسياسى ءوتتى. كۇن تارتىبىندە جالپى 15 ماسەلە قارالىپ، دەپۋتاتتار تاراپىنان قولداۋ تاپتى. سەسسيانى شىمكەنت قالاسى ءماسليحاتىنىڭ حاتشىسى باحادىر نارىمبەتوۆ جۇرگىزىپ وتىردى.

جيىندا الدىمەن «2021-2023 جىلدارعا ارنالعان شىمكەنت قالاسىنىڭ بيۋدجەتى تۋرالى» ءماسليحات شەشىمىنە وزگەرىستەر ەنگىزۋ ماسەلەسى تالقىعا ءتۇستى. بۇل جونىندە قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ر.مۇلكەمانوۆ بايانداما جاسادى. ونىڭ ايتۋىنشا، دەنساۋلىق ساقتاۋ، ءبىلىم، الەۋمەتتىك قورعاۋ، جول قۇرىلىسى، كوپ قاباتتى تۇرعىن ۇيلەردى كۇردەلى جوندەۋ، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ، يندۋستريالدى ايماقتاردى دامىتۋ، تاعى باسقا سالالارعا قوسىمشا قارجى باعىتتاۋعا ۇسىنىس ەنگىزىلگەن. ناتييجەسىندە قالا بيۋدجەتىنىڭ كولەمى 481 ملرد 600 ملن تەڭگەدەن، 490 ملرد 600 ملن تەڭگەگە ارتاتىن بولادى. قالا بيۋدجەتىن ناقتىلاۋ ماسەلەسى قالالىق ءماسليحاتتىڭ تۇراقتى كوميسسيالارىندا، قوعامدىق كەڭەستە جان-جاقتى تالقىلانعان.

سەسسيادا 2021-2022 جىلعى جىلۋ ماۋسىمىنا دايىندىق شارالارى تۋرالى شىمكەنت قالاسىنىڭ ەنەرگەتيكا جانە ينفراقۇرىلىمدى دامىتۋ باسقارماسىنىڭ ەسەبى تىڭدالدى. باسقارما باسشىسى بورانباي بۋلاتبەكوۆتىڭ مالىمدەۋىنشە، بۇگىندە قالا بويىنشا 1945 تۇرعىن ءۇيدىڭ 1847ء-ى قىسقى ماۋسىمعا دايىن. بۇل – 95 پايىز كورسەتكىش. اتاپ ايتقاندا، اباي اۋدانىندا 394، ءال-فارابي اۋدانىندا 575، ەڭبەكشى اۋدانىندا 500، قاراتاۋ اۋدانى بويىنشا 378 ءۇي دايىن.
ودان بولەك، 482 بيۋدجەتتىك نىساننىڭ 480-ى جىلىتۋ ماۋسىمىنا دايىندالدى. بيۋدجەتتىك مەكەمەلەرگە 980 توننا سۇيىق وتىن، 4،7 مىڭ توننا كومىر قاجەت.

سونداي-اق، سەسسيا بارىسىندا ءتورت اۋدان اكىمدەرى وڭىرلەردىڭ دامۋ ستراتەگياسى بويىنشا 2021 جىلدىڭ 8 ايىندا اتقارىلعان جۇمىستاردى باياندادى. اباي اۋدانىنىڭ اكىمى ب. پارمانوۆ، ءال-فارابي اۋدانىنىڭ اكىمى ر.مىڭبايەۆ، ەڭبەكشى اۋدانىنىڭ اكىمى د. ەسىلبەك جانە قاراتاۋ اۋدانىنىڭ اكىمى ا. ءالىقۇلوۆ اباتتاندىرۋ، ينجەنەرلىك ينفراقۇرىلىم جۇيەلەرى، قىسقى جىلۋ ماۋسىمىنا دايىندىق بارىسى جونىنەن حاباردار ەتتى.
ءماسليحات دەپۋتاتتارى اتالعان شەشىمدەردى ءبىراۋىزدان قولدادى.

سونىمەن قاتار، سەسسيادا شىمكەنت قالاسىنداعى كوشى-قون پروسەستەرىن رەتتەۋ قاعيدالارىن بەكىتۋ، «جەرگىلىكتى مەملەكەتتىك-جەكەشەلىك ارىپتەستىك جوبالارىنىڭ تىزبەسىن بەكىتۋ تۋرالى» ءماسليحات شەشىمىنە تولىقتىرۋ ەنگىزۋ ماسەلەلەرى قولداۋ تاپتى.