شىمكەنتتە جۇمىسسىز جاستارعا ارنالعان «مۇمكىندىكتەر الاڭى» اتتى بوس جۇمىس ورىندارىنىڭ جارمەڭكەسى ءوتتى. اتالمىش ءىس-شارادا ەكى قولعا ءبىر كۇرەك تاپپاي جۇرگەندەرگە 9 مىڭنان اسا تۇراقتى بوس جۇمىس ورىندارى ۇسىنىلدى. ايتا كەتەيىك، بۇل جارمەڭكەگە جاس ماماندارعا جۇمىس بەرۋشى 50-گە جۋىق مەكەمە قاتىستى.

جۇمىسسىزدىقپەن كۇرەسۋ جانە ونىڭ الدىن الۋ ماقساتىندا قالامىزدا بوس جۇمىس ورىندار جارمەڭكەسى ءوتتى. شارادا 50-گە تارتا مەكەمە قاتىسىپ، جاستارعا 9 مىڭنان استام بوس جۇمىس ورنىن ۇسىندى. ولار مەديسينالىق، تەحنيكالىق، پەداگوگيكالىق، جەڭىل ونەركاسىپ جانە قىزمەت كورسەتۋ سالالارى بويىنشا تۇراقتى جانە ۋاقىتشا بوس جۇمىس ورىندارى. شارانىڭ اشىلۋىنا قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا قاتىستى.

بۇگىندە 8،5 مىڭنان استام ادام جۇمىسپەن قامتۋ ورتالىعىندا تىركەۋدە تۇر. ونىڭ 5 مىڭى جۇمىسپەن قامتۋ شارالارىنا قاتىسۋدا. جۇمىس ىزدەپ كەلۋشىلەر اراسىندا ەلەكتريك، كۇزەتشى، ەدەن جۋۋشى، اۋلا سىپىرۋشى سىندى جۇمىستار دا سۇرانىسقا يە بولدى.

سونداي-اق، اۋىسىمدىق ادىسپەن جۇمىس ىزدەپ جۇرگەندەر بار. جۇمىس ىزدەۋشىلەردىڭ قاتارىندا بۇگىندە بالا كۇتىمىندە وتىرعان ەكى بالانىڭ اناسى – گۋلنوزا سابۋروۆا دا بولدى. ول ءوزىنىڭ بوس ۋاقىتىندا قوسىمشا تابىس تابۋ ماقساتىندا قالاداعى ساۋدا ورىندارىنىڭ بىرىنەن ۋاقىتشا جۇمىس تاپسام دەپ وتىر.

سونىمەن قاتار، جارمەڭكەدە «ەڭبەك» مەملەكەتتىك باعدارلاماسى شەڭبەرىندە جۇمىس كۇشى تاپشى وڭىرلەردى قامتاماسىز ەتۋ ماقساتىندا ازاماتتاردى سولتۇستىك وڭىرلەرىنەن جۇمىس ورىندارى ۇسىنىلدى. باعدارلاماعا قاتىسۋشىلار پاۆلودار وبلىسىنا جۇمىسقا ورنالاسۋعا مۇمكىندىك الادى. سول وبلىستاعى جۇمىسپەن قامتۋ جانە الەۋمەتتىك باعدارلامالار باسقارماسىنىڭ كوشى-قون ءبولىمىنىڭ باسشىسى مەرۋەرت ەسەمبايەۆا ارنايى سۇحبات بەرىپ، باعدارلاماعا كىمدەر قاتىسا الاتىنىنا توقتالدى.

ايتۋىنشا، باعدارلامانى جۇزەگە اسىرۋ ءۇشىن رەسپۋبليكالىق بيۋدجەتتەن 2 600 وتباسىعا كۆوتا بولىنگەن. بۇگىندە پاۆلودار وبلىسىنا 2 200 وتباسى قونىس اۋدارىپ، جۇمىسپەن قامتىلعان. ال قالعان 400 وتباسىنى الداعى ۋاقىتتا كوشىرۋ جوسپارلانىپ وتىر.

ايتا كەتسەك، جىل باسىنان بەرى «ەڭبەك» مەملەكەتتىك باعدارلاماسى شەڭبەرىندە 18 مىڭنان استام شىمكەنتتىكتەر جۇمىسپەن قامتۋ شارالارىنا قاتىستى. ونىڭ ىشىندە 2384 ازامات تۇراقتى جۇمىسپەن قامتىلعاندار بولسا، قالعان 102 ازامات العاشقى جۇمىس ورنى جوباسىمەن قىزمەتكە جولدانعاندار.