قالادا سوڭعى اپتادا ەپيدەميولوگيالىق احۋال تۇراقتالا باستادى. شىمكەنت قالاسى ەپيدەميولوگيالىق جاعداي بويىنشا «سارى ايماققا» ەندى.

شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆتىڭ ايتۋىنشا، قالادا 45 بەكەتتە ۆاكسينالاۋ جۇمىستارى جۇرگىزىلۋدە. ەگۋ ناۋقانى باستالعالى بارلىعى 477 496 ادام ۆاكسينالاندى. ونىڭ ىشىندە 392 630 ادام ەكپەنىڭ ەكى كومپونەنتىن الدى.

بۇگىندە مەديسينالىق قىزمەتكەرلەردى ۆاكسينالاۋ 100 پايىز، قۇقىق قورعاۋ قىزمەتكەرلەرىن 100، مۇعالىمدەر 183، سوزىلمالى اۋرۋلارى بار ازاماتتار 95، ستۋدەنتتەردى ۆاكسينالاۋ 109 پايىزعا ورىندالدى. ازاماتتارعا ۆاكسينانىڭ سپۋتنيك، QazCOVID-In، Hayat-Vax، CoronaVAC، Vero CELL تۇرلەرى ەگىلۋدە.

قالا اكىمدىگى جانىنان اشىلعان call-center تاۋلىك بويى جۇمىس ىستەيدى. قالاداعى بيزنەس سۋبەكتىلەرى ءۇشىن «Ashyq» جوباسى ەنگىزىلگەن بولاتىن. شاھاردا ASHYQ جوباسىنا قوسىلعان بيزنەس سۋبەكتىلەرىنىڭ سانى 8 547-گە جەتتى. قازىرگى كەزدە 521 تۇرعىننان «سارى» ستاتۋس، 1310 تۇرعىننان «قىزىل» ستاتۋس انىقتالىپ وتىر.

سونداي-اق، بۇگىنگە دەيىن بارلىق اۋدان بويىنشا 35356 نىسانعا تەكسەرۋ جۇمىستارى جۇرگىزىلدى. ونىڭ ىشىندە 2417 كارانتيندىك تالاپتاردى بۇزۋ فاكتىلەرى تىركەلدى.