مەملەكەت باسشىسىنىڭ حالىقپەن كەرى بايلانىس ورناتۋدى كۇشەيتۋ تۋرالى تاپسىرماسىنا سايكەس قالا اكىمىنىڭ باستاماسىمەن وسىدان 1 جىل بۇرىن شىمكەنتتە «ايكومەك-109» ورتالىعى اشىلعان بولاتىن. بۇگىندە قالا تۇرعىندارىن جەرگىلىكتى بيلىك وكىلدەرىمەن بايلانىس ورناتۋدا ءتيىمدى جۇمىس ناتيجەسىن كورسەتىپ وتىر.

@ikomek109.shymkent - قالا تۇرعىندارىنىڭ قوعامدىق كولىكتەردە، ادامدار كوپ شوعىرلانعان جانە تاعى باسقا جەرلەردە زاتتاردى تاۋىپ العان نەمەسە جوعالتىپ العان ادامداردى دەلدالسىز بايلانىستىراتىن ورتالىق. سەبەبى سوڭعى ۋاقىتتا مۇندا تۇرعىندار تاراپىنان جوعالعان زاتىن ىزدەپ حابارلاسۋشىلار كوبەيگەن.

وسى جىلى ورتالىق قىزمەتكەرلەرى جاۋاپتى مەكەمەلەرمەن بىرلەسە وتىرىپ مەگاپوليس تۇرعىندارىنىڭ 592 جوعالعان زاتىنن تاۋىپ بەرگەن. اتاپ ايتقاندا 217 سومكە، 144 ءاميان، 129 قۇجاتتارى بار فايلدار، 15 ساعات، 6 ۇيالى بايلانىس قۇرالى، 4 نوۋتبۋك، 3 دومبىرا، 2 اياق-كيىم جانە 72 تولەم كارتالار تابىلدى.

تابىلعان تولەم كارتالاردى، قۇجاتتاردى ورتالىقتىڭ Instagram الەۋمەتتىك جەلىسىندەگى پاراقشاسى @ikomek109.shymkent-تە Stories رەتىندە سالىنادى. ازاماتتار جوعالتقان قۇجاتتارىن سول جەردەن كورە الادى.