شىمكەنت قالاسىنىڭ «شاپاعات» الەۋمەتتىك قىزمەتتەر كورسەتۋ ورتالىعى جانىنان اشىلعان «TEN QOGAM» سەكتورى مۇمكىندىگى شەكتەۋلى ازاماتتاردى الەۋمەتتىك قورعاۋ باعىتىندا جۇمىس ىستەيدى.

بيىل 1 شىلدەدە اشىلعان كەڭەس بەرۋ سەكتورى بۇگىنگە دەيىن جالپى 3 377 مۇمكىندىگى شەكتەۋلى ازاماتقا الەۋمەتتىك ماسەلەلەر بويىنشا قىزمەتتەر كورسەتتى. ماسەلەن، الەۋمەتتىك قىزمەتتەر پورتالىن قولدانۋدا كومەك بەرۋ، مۇمكىندىگى شەكتەۋلى جانداردى جۇمىسقا قابىلداۋ بويىنشا كەڭەس بەرۋ، جەكەلەي سۇيەمەلدەۋ، پسيحولوگتىڭ كومەگى جانە ت.ب.، باعىتتا جۇمىستار جۇرگىزدى.

اتالعان قىزمەتتەردىڭ ىشىندە ساناتورلىق-كۋرورتتىق ەمدەلۋگە جولداما الۋعا ءوتىنىش تاستاعاندار سانى – 1840، ال جولداما العان مۇگەدەكتىگى بار ازاماتتار سانى – 1406. مۇمكىندىگى شەكتەۋلى ازاماتتارعا ارنالعان الەۋمەتتىك قىزمەتتەر پورتالى ارقىلى مىندەتتى گيگيەنالىق قۇرالدار الۋعا 89 ءوتىنىش قابىلداندى. سونىمەن بىرگە، پسيحولوگيالىق كەڭەس العاندار – 15 ازامات.

ەڭبەككە قابىلەتتى مۇمكىندىگى شەكتەۋلى ازاماتتاردىڭ «ەڭبەك» مەملەكەتتىك باعدارلاماسى اياسىندا جۇمىسپەن قامتۋ جۇمىستارى جۇزەگە اسىرىلۋدا. باعدارلامانىڭ ءىىى باعىتى «جاستار پراكتيكاسى» بويىنشا 5 ازامات ۋاقىتشا جۇمىسقا ورنالاستى.

اتالعان الەۋمەتتىك كەڭەس بەرۋ سەكتورىنا جۇگىنىپ، جۇمىسپەن قامتىلعان ازاماتتاردىڭ ءبىرى – ساردور باياحماتوۆ. ول – ءىىى توپ مۇگەدەگى. قالا تۇرعىنى بىلتىر سايرام مەديسينالىق كوللەدجىن «فەلدشەر» ماماندىعى بويىنشا بىتىرگەن. جاس مامان «تen qogam» سەكتورىنىڭ اشىلعانى تۋرالى ەستىپ، مۇمكىندىگى شەكتەۋلى ازاماتتاردىڭ جۇمىسقا ورنالاسۋى بويىنشا كەڭەس الۋعا كەلگەن. كەيىننەن ماماندار «جاستار پراكتيكاسى» باعدارلاماسى اياسىندا جۇمىس ۇسىنعان سوڭ، ناتيجەسىندە 2021 جىلدىڭ تامىز ايىندا «№12 قالالىق ەمحاناعا» فەلدشەر مامانى رەتىندە جىل سوڭىنا دەيىن جۇمىسقا جولداندى.

مۇگەدەكتىگى بار ازاماتتار http://aleumet.egov.kz سىلتەمەسىمەن «الەۋمەتتىك قىزمەتتەر پورتالى» ارقىلى تەحنيكالىق وڭالتۋ قۇرالدارىنىڭ 55 تۇرىنە جانە ءتۇرلى قىزمەتتەرگە ونلاين تاپسىرىس بەرە الادى. پورتال مۇمكىندىگى شەكتەۋلى ازاماتتارعا ۇيىنەن شىقپاي ەسق كومەگىمەن كوپتەگەن مۇمكىندىك ۇسىنىپ وتىر. پورتال ارقىلى تاڭدالعان تاۋار ازاماتتىڭ ۇيىنە جەتكىزىلەدى نەمەسە قويمادان ءوزى الىپ كەتە الادى.