ۇستازداردىڭ جاعدايىن جاساپ، ولاردى ماتەريالدىق تۇرعىدا قولداۋىمىز كەرەك. بۇگىن وڭىرىمىزگە ارنايى ىس-ساپارمەن كەلگەن ق ر ءبىلىم جانە عىلىم ءمينيسترى اسلان سارىنجىپوۆپەن كەزدەسكەن وبلىس اكىمى بەيبىت اتامقۇلوۆ وڭىردەگى ۇزدىك ۇستازداردى باسپانامەن قامتۋ ماسەلەسىن كوتەرىپ، مينيسترگە ۇسىنىس ايتتى. مۇعالىمدەرگە مەملەكەت تاراپىنان جاسالاتىن كومەك ماسەلەسىن ىجداعاتتىلىقپەن تىڭداعان ەلىمىزدىڭ باس ءمۇعالىمى بۇل ۇسىنىستىڭ جان-جاقتى قارالاتىنىن ايتتى. وبلىستىڭ ءبىلىم سالاسىنداعى تۇيتكىلدى پروبلەمالارى مەن بىلىكتىلىگى جوعارى مامانداردى دايارلاۋ ماسەلەلەرى ءسوز بولعان جيىندا ايماق باسشىسى ەلىمىزدەگى ءاربىر ءۇشىنشى «التىن بەلگىنىڭ» يەگەرى وڭتۇستىكتەن شىعاتىنىن، ۇبت قورىتىندىسى بويىنشا ورتا بالل 78،8 بولىپ، ءبىلىم سالاسى بويىنشا رەسپۋبليكا كولەمىندە الدىڭعى قاتاردا ەكەنىن ايتتى. وبلىستاعى جوعارى كورسەتكىشتەردى راستاعان ءبىلىم ءمينيسترى وڭىردەگى 11 جوعارعى وقۋ ورنىنىڭ ستۋدەنتتەرى ستۋدەنتتەر ليگاسى سپارتاكياداسىندا دا بەلسەندى ەكەنىن ريزاشىلىقپەن مالىمدەدى. وڭتۇستىككە جاساعان ساپارى بارىسىندا ءبىلىم ءمينيسترى وقو مەملەكەتتىك پەداگوگيكالىق ينستيتۋتىنداعى جاڭا ستۋدەنتتەر ءۇيىنىڭ اشىلۋ سالتاناتىنا قاتىستى. 500 ورىنعا لايىقتالعان 12 قاباتتى ستۋدەنتتەر ءۇيىن سالۋعا مەملەكەتتىك بيۋدجەتتەن 1 ميللارد تەڭگەدەن استام قارجى جۇمسالعان. مۇندا بولاشاق پەداگوگتار ءۇشىن بارلىق جاعداي جاسالعان. نىسان ىشىندە كىتاپحانا، اسحانا، ارنايى مەديسينالىق كابينەتتەر، حيميالىق تازارتۋ بولىمشەسى، شاشتاراز جانە تاعى باسقا قىزمەت كورسەتۋ بولىمدەرى اشىلعان. قازاقستاندا تەڭدەسى جوق جاتاقحانادا بولعان اسلان ءسارىنجىپوۆ ءاربىر وقۋ ورنىنىڭ ماڭىندا اقپاراتتىق تەحنولوگيالىق ورتا قۇرىلىپ، WiFi جەلىسى تەگىن تارتىلۋى قاجەتتىگىن ايتتى. سونداي-اق، جوعارعى وقۋ ورىندارىنىڭ جانىندا الكوگولسىز ءدامحانالار جۇمىس ىستەۋى كەرەك دەگەن پىكىرىن دە جەتكىزدى.

وقو اكىمىنىڭ باسپا ءسوز قىزمەتى