شىمكەنت قالاسىندا تۋريزم جانە سىرتقى بايلانىستار باسقارماسىنىڭ ۇيىمداستىرۋىمەن جانە مادەنيەت، تىلدەردى دامىتۋ جانە ارحيۆتەر باسقارماسىنىڭ قولداۋىمەن «Shymkent 2200: تۋريستىك كرەاتيۆتى قالا بەينەسى» فورۋم-كورمەسى باستاۋ الدى. 27 قىركۇيەك – دۇنيەجۇزىلىك تۋريزم كۇنىنە وراي ەكى كۇنگە سوزىلاتىن فورۋمنىڭ العاشقىسى «قازاق اۋىلىنان» باستالدى.

شاراعا قاتىسقان قالا اكىمىنىڭ ورىنباسارى ماقسۇت يساحوۆ: شىمكەنت – تۋريستىك الەۋەتى جوعارى، 2200 جىلدىق تاريحى بار، ەلىمىزدەگى ءوزىنىڭ تاريحي وزەگىن ساقتاپ قالعان بىرەگەي قالا. ەلباسى نۇرسۇلتان ءابىش ۇلى نازاربايەۆ ءوز جولداۋىندا اتاپ وتكەندەي، الەمدەگى ءاربىر ونىنشى جۇمىس ورنىن اشىپ وتىرعان تۋريزم سالاسى كەز كەلگەن ءوڭىر ءۇشىن پەرسپەكتيۆالىق تابىس كوزدەرىنىڭ ءبىرى بولىپ سانالادى. «شىمكەنت 2200: تۋريستىك كرەاتيۆتى قالا بەينەسى» ءىس-شاراسى تۋريستىك يندۋستريانى دامىتۋدىڭ باسەكەگە قابىلەتتى جانە تابىستى جوبالارىن انىقتاۋعا جانە ءوزارا تابىستى ىنتىماقتاستىق ورناتۋعا تاپتىرماس الاڭ بولادى دەپ سەنەمىن»، - دەگەن پىكىرىن ءبىلدىردى.

«قازاق اۋىلىنا» كەلۋشى نۇر-سۇلتان قالاسى جانە الماتى، قىزىلوردا، اتىراۋ، جامبىل، اقتوبە وبلىستارىنىڭ تۋريستىك سالا وكىلدەرى شاھاردىڭ قولونەرشىلەرى مەن سۋرەتشىلەرىنىڭ تۋىندىلارىمەن تانىسىپ، جەرگىلىكتى اس ءۇي تاعامدارىنان ءدام تاتىپ، تەاترلاندىرىلعان قويىلىمداردى تاماشالادى.

بۇدان بولەك، ءىس-شاراعا قاتىسۋشىلار سيتادەل كونە قالاشىعى، سايرام تۇرعىن الابىنداعى يبراگيم اتا، قاراشاش انا كەسەنەلەرى، بايدىبەك بي ەسكەرتكىشى، «قازىنا» ەتنو-كەشەنى، جايلاۋكول ساياباعى، ا. اسقاروۆ اتىنداعى دەندروساياباققا جانە اربات الاڭىنداعى «Visit Shymkent» تۋريستىك اقپاراتتىق ورتالىعىنىڭ اقپاراتتىق دۇڭگىرشەگى سىندى ءبىرشاما نىساندارىن ارالادى.

ايتا كەتەيىك، شارانىڭ ەكىنشى كۇنىندە كەلۋشىلەرگە ارنالعان فورۋم وتەدى. فورۋم اياسىندا كرەاتيۆتى جوبالاردىڭ كونكۋرسى ءتامامدالىپ، مەديا، IT-جوبا، كرەاتيۆتى ارحيتەكتۋرا، تۋريزم سالاسىنداعى كرەاتيۆتى قىزمەتتەر، قالانىڭ قولونەر برەندى جانە گاسترونوميا باعىتتارىندا ۇزدىك جوبالار ماراپاتتالاتىن بولادى. جوبالاردى باعالاۋ ءۇشىن شىمكەنت قالاسىنىڭ بيزنەس وكىلدىكتەرى، تۋريزم سالاسىنىڭ ماماندارى، زيالى قاۋىم وكىلدەرى قازىلىق ەتەدى.