بۇگىن قالا اكىمى مۇرات ايتەنوۆ «Shymkent 2200: تۋريستىك كرەاتيۆتى قالا بەينەسى» فورۋم-كورمەسىنە قاتىسىپ، بارشا قالا تۇرعىندارىن 27 قىركۇيەك – دۇنيەجۇزىلىك تۋريزم كۇنى مەرەكەسىمەن قۇتتىقتادى.

«مەملەكەت باسشىسى تۋريزم يندۋسترياسى ەكونوميكالىق ءوسىمنىڭ ماڭىزدى درايۆەرى بولۋى ءتيىس ەكەندىگىن ايتتى. الەمدەگى كوپتەگەن قالالاردىڭ ەكونوميكاسى تۋريزم تابىسىنان قۇرالادى. وسى مۇمكىندىك شىمكەنت قالاسىنىڭ دامۋ باعدارى بولۋى كەرەك. تۋريستىك كرەاتيۆتى قالا قالىپتاستىرۋ بويىنشا بۇگىنگى فورۋم-كورمەدە قالامىزدا تۋريزم يندۋسترياسىن دامىتۋ مۇمكىندىكتەرى قاراستىرىلادى. قالا اۋماعىندا ەجەلگى سايرام تۇرعىن الابىندا سوپىلىق ءىلىمنىڭ نەگىزىن قالاۋشى ق.ءياساۋيدىڭ تۋعان جەرى، سونداي-اق اتا-اناسى «يبراگيم اتا»، «قاراشاش انا» كەسەنەلەرى ورنالاسقان. سوندىقتان وڭتۇستىك ءوڭىرىنىڭ تاريحي-ساكرالدى تۋريزمىنە ساياحات شىمكەنت قالاسىنان باستاۋ الادى»،- دەدى م.ايتەنوۆ.

فورۋمدا كرەاتيۆتى يندۋستريالاردى دامىتۋ جونىندەگى جوبالىق كەڭسەنىڭ جەتەكشىسى دانات جۋمين، «Salem Coffee» جانە «Global Coffee» كوفەحانالار جەلىسىنىڭ نەگىزىن قالاۋشى ايات ازيموۆ، شىمكەنت قالالىق «اتامەكەن» كاسىپكەرلەر پالاتاسىنىڭ ديرەكتورى نۇرلان قابىشتايەۆ جانە باسقا دا تۋريستىك قىزمەت كورسەتەتىن كاسىپ وكىلدەرى جەتىستىكتەرىن ايتىپ، يدەيالارىمەن ءبولىستى.

ءىس-شارا اياسىندا قالالىق تۋريزم جانە سىرتقى بايلانىستار باسقارماسى، نۇر-سۇلتان قالاسىنىڭ ينۆەستيسيالار جانە كاسىپكەرلىكتى دامىتۋ باسقارماسى، قىزىلوردا وبلىسى كاسىپكەرلىك جانە تۋريزم باسقارماسى، م.اۋەزوۆ اتىنداعى وقمۋ اراسىندا، سونىمەن قاتار، «Visit Shymkent» تۋريستىك اقپاراتتىق ورتالىعى مەن «تاراز تۋريزم»، «OCA TRAVEL» تۋريستىك اگەنتتىگى اراسىندا ەكى جاقتى كەلىسىمگە قول قويىلىپ، جەڭىمپازدار ماراپاتتالاتىن بولادى.