مەملەكەت باسشىسى ق.توقايەۆ ءوز جولداۋىندا 2025 جىلعا دەيىن سالىناتىن مەكتەپ سانىن مىڭعا جەتكىزۋدى مىندەتتەپ، مەكتەپتەردى سالۋعا مەملەكەتتىك بيۋدجەتتەرمەن قاتار جەكە سەكتوردى دا تارتۋدى تاپسىرعان بولاتىن. شىمكەنت قالاسىندا بۇل باعىتتاعى جۇمىس قارقىن الىپ، ءۇشاۋىسىمدى مەكتەپ ماسەلەسىن شەشۋدە جەكەمەنشىك مەكتەپتەردىڭ دە اسەرى بار.

جان باسىنا قارجىلاندىرۋ ارقىلى ق ر ءبىلىم بەرۋ ستاندارتىنا سايكەس جۇمىس جۇرگىزۋدى باستاعان ءبىلىم مەكەمەسىنىڭ ءبىرى – «Ali-T» اعىلشىن باستاۋىش مەكتەبى. 160 ورىنعا شاقتالعان مەكتەپتە ءقازىر 154 بالا ءبىلىم الۋدا.

باستاۋىش مەكتەپتە بەكىتىلگەن ءبىلىم ستاندارتىنا ساي 1-4 سىنىپ وقۋشىلارى اقىسىز وقيدى. اتا-انالاردىڭ ىڭعايى بويىنشا ۇزارتىلعان كۇن توبى اقىلى جۇرگىزىلەدى.

–نەگىزگى باعىتىمىز اعىلشىن ءتىلىن تەرەڭدەتىلىپ وقىتاتىن بولعاندىقتان ۇزارتىلعان كۇن توبىندا اعىلشىن ءتىلى، دۇنيەتانۋ جانە دەنەشىنىقتىرۋ ساباقتارى قارالىپ، شەت تىلىندە ءبىلىم الادى. بۇلدىرشىندەر تۇسكە دەيىنگى بولىمدە تەگىن وقىسا، ولاردىڭ ءۇش مەزگىل تاماعى مەن قوسىمشا تەرەڭدەتىلگەن پاندەر اقىلى بولادى. ارينە، بۇل اتا-انالاردىڭ ىڭعايىنا قاراي امالعا اسادى، -دەيدى «Ali-T» باستاۋىش مەكتەبىنىڭ قۇرىلتايشىسى ايمان بەردىمبەتوۆا.

ايتا كەتسەك، مەكتەپ كومپيۋتەر مەن مونوبلوكتارمەن، ينتەراكتيۆتى تاقتا، مۋلتيمەديالىق سىنىپتارمەن جابدىقتالعان. ارنايى مەديسينالىق قىزمەت كورسەتۋ كابينەتى دە بار. بالالار قاۋىپسىزدىگىن قامتاماسىز ەتۋ ءۇشىن بەينە باقىلاۋ جۇيەلەرى ورناتىلعان. مەكتەپتە شىعارماشىلىق توپتار مەن ۇيىرمەلەر جۇمىس ىستەيدى. اتاپ ايتار بولساق، تاەكۆوندو، باتۋتتىق اكروباتيكا، كوركەم گيمناستيكا، شاحمات، بي ونەرى، كوركەم سۋرەت ت.ب. ۇيىرمەلەردە بالا ءوزىن-وزى دامىتۋعا مۇكىندىك الادى.