شىمكەنت قالالىق سوتىندا اكىمشىلىك-راسىمدىك پروسەستىك كودەكسى نورمالارىن قولدانۋ ماسەلەلەرى بويىنشا وتكەن «دوڭگەلەك ۇستەل» ماجىلىسىنە قالالىق سوت پەن اكىمشىلىك سوتتىڭ سۋديالارى، ادۆوكاتتار مەن مەملەكەت ورگاندارىنىڭ باسشىلارى جانە قىزمەتكەرلەرى قاتىستى.

جيىن شىمكەنت قالالىق سوتىنىڭ اكىمشىلىك ىستەر جونىندەگى سوت القاسىنىڭ ءتوراعاسى گ.قىدىربايەۆا اشىپ، ءسوز كەزەگىن سوت القاسىنىڭ سۋدياسى ب.ناسىردىنوۆكە بەردى. سۋديا اكىمشىلىك ادىلەتتىڭ العاشقى ناتيجەلەرىمەن ءبولىسىپ، جاڭا كودەكستە سوت تالاپتارى دالەلسىز سەبەپتەرمەن ورىندالماعان جاعدايدا جاۋاپتىلىق قاراستىرىلعانىن اتاپ كورسەتتى. شىمكەنت قالاسىنىڭ مامانداندىرىلعان اكىمشىلىك سوتى شىلدە-تامىز ايىندا ءتورت لاۋازىمدى تۇلعاعا قاتىستى اقشالاي ءوندىرىپ الۋ قولدانعانى تۋرالى مىسالدار كەلتىردى.

اكىمشىلىك سوتتىڭ سۋدياسى ن.راحىنبايەۆ ەكى ايدا تۇسكەن ىستەردىڭ ستاتيستيكاسىن سارالاپ، اكىمشىلىك ادىلەت جۇيەسىن، كودەكس نورمالارىن تولىق تۇسىنبەي، سوتقا جۇگىنگەندەر كەزدەسكەنىن ايتتى. كوپتەگەن اكىمشىلىك سوت ءىسىن جۇرگىزۋ تارتىبىمەن قاراۋعا جاتپاۋىنا بايلانىستى قايتارىلعان. دەگەنمەن، كوبىنە تالاپ قويۋشىنىڭ ءوزى تالاپ قويۋ ارىزىن كەرى قايتارىپ جاتتى دەدى سۋديا.

ماجىلىستە اكىمشىلىك-راسىمدىك پروسەستىك كودەكسىندەگى تاتۋلاستىرۋ راسىمدەرى تۋرالى ءسوز بولدى. سپيكەرلەر جينالعاندارعا داۋدى سوتقا دەيىن رەتتەۋ مۇمكىندىكتەرى جايىندا كەڭىنەن ءتۇسىندىردى. كودەستەگى «اكىمشىلىك قالاۋدى» زاڭ شەڭبەرىندە، قۇزىرەت شەگىنەن اسپاي جۇرگىزۋدى ۇسىندى.

سپيكەرلەر اكىمشىلىك تالاپتىڭ زاڭ نورمالارىنا سايكەس راسىمدەلۋى الدىمەن ادۆوكاتتار مەن قورعاۋشىلارعا بايلانىستى ەكەنىن ايتىپ، ساۋاتتى جازىلعان اكىمشىلىك تالاپ ءوز كەزەگىندە ولاردىڭ كەرى قايتارىلۋىن ازايتاتىنىن العا تارتتى.

سونىمەن قاتار، اكىمشىلىك سوتقا تۇسكەن تالاپتاردىڭ ىشىندە سانى جاعىنان ەڭ كوبى سوت ورىنداۋشىلارىنىڭ ارەكەتتەرىنە شاعىمدانۋمەن بايلانىستى 2 ايدا 81 اكىمشىلىك تالاپ تۇسكەن. وسى رەتتە، قالالىق ادىلەت دەپارتامەنتى باسشىسىنىڭ ورىنباسارى اينۇر يسابەكوۆا مەملەكەتتىك ورگاننىڭ تالاپ قويۋ مۇمكىندىكتەرى تۋرالى ايتىپ، اكىمشىلىك ادىلەت جۇيەسىنىڭ ىسكە اسۋى تۋراسىندا ويىن ورتاعا سالدى.

اكىمشىلىك سوتقا تۇسكەن جالپى 279 اكىمشىلىك تالاپتىڭ 42ء-سى مەملەكەتتىك ساتىپ الۋ ماسەلەلەرىن كوتەرگەن. سالاداعى داۋلى ىستەردىڭ كوپتىگى ويلاندىرماي قويمايدى دەدى سۋديا ب.ءناسىردىنوۆ. مەملەكەتتىك ساتىپ الۋ تۋرالى ىستەردىڭ باسىم بولىگىندە كونكۋرستىق كوميسسيانىڭ حاتتاماسى داۋلاناتىنىن تىلگە تيەك ەتىپ، جاۋاپتى ورگان وكىلدەرىنە حاتتامالاردى راسىمدەگەندە قايتارۋ نەگىزدەرىن تولىق كورسەتۋ كەرەك ەكەنىن ەسكەرتتى.

ماجىلىسكە قاتىسقاندار پىكىر الماسۋدا بەلسەندىلىك تانىتتى. جيىندى قورىتىندىلاعان شىمكەنت قالالىق سوتىنىڭ اكىمشىلىك ىستەر جونىندەگى سوت القاسىنىڭ ءتوراعاسى گ.قىدىربايەۆا اكىمشىلىك ىستەردە تارازىنىڭ ءبىر جاعىندا مەملەكەتتىك ورگان، ەكىنشىسىندە – جەكە جانە زاڭدى تۇلعالار تۇرعاندىقتان بۇل سالاداعى زاڭنامانى ءبىلۋ اركىم ءۇشىن وتە ماڭىزدى ەكەنىن ايتىپ، وسى تەكتەس جيىندار الداعى ۋاقىتتا دا وتكىزىلىپ تۇراتىنىن ايتتى.