سوتقا جالپى 279 تالاپ ارىز ءتۇستى. 15 ءىس بويىنشا شەشىم شىعارىلعان. ياعني، قاناعاتتاندىرىلعان تالاپ قويۋلار بويىنشا اۋىرتپالىق تۇسىرەتىن اكتىلەردىڭ كۇشىن جويۋ، ماجبۇرلەۋ تۋرالى شەشىمدەر قابىلدانىپ، جەكە جانە زاڭدى تۇلعالاردىڭ زاڭدى مۇددەلەرى قورعالدى.

الدىڭعى كەزەڭدەردە مەملەكەتتىك ورگاندارمەن تاتۋلاسۋ مۇمكىن ەمەس دەپ سانالسا، بۇگىنگى تاڭدا تاتۋلاستىرۋ راسىمدەرى جاريا-قۇقىق داۋلاردا دا قولدانىلادى.

وسى كورسەتكىشتە، الدىن الا تىڭداۋدا سوت 6 اكىمشىلىك ءىس داۋدى بىتىمگەرشىلىك جانە مەدياسيا تارتىبىمەن رەتتەۋ كەلىسىمدەرى بەكىتۋ نەگىزدەرىمەن اياقتالعان. بۇل بىتىمگەرشىلىك كەلىسىمدەر جەكە سوت ورىنداۋشىلارىنىڭ ارەكەتتەرىنە داۋ ايتۋ تۋرالى تالاپ قويۋلار بويىنشا ورىن العان.

سوت تالاپتارىن ورىنداماعانى ءۇشىن 4 لاۋازىمدى تۇلعاعا قاتىستى اقشالاي ءوندىرىپ الۋ قولدانىلدى. اتاپ ايتقاندا، پروسەستىك ماجبۇرلەۋ شارالارى مەملەكەتتىك ورگاننىڭ باسشىسىنا جانە ولاردىڭ ورىنباسارلارىنا قاتىستى قولدانىلىپ، ونىڭ ەكەۋى ورىندالدى.

ەگەر تۇسكەن ىستەردى جىكتەيتىن بولساق، ەڭ كوپ كورسەتكىش سوت ورىنداۋشىلارىنىڭ ارەكەتتەرىنە شاعىمدانۋمەن بايلانىستى - 81 تالاپ ارىز، مەملەكەتتىك ساتىپ الۋدان تۋىندايتىن داۋلار بويىنشا - 42، سالىق زاڭناماسىنان تۋىندايتىن داۋلار بويىنشا - 47، جەر داۋلارى بويىنشا - 41، تۇرعىن ءۇي جانە باسقادا ساناتتاعى داۋلار بويىنشا 63 تالاپ ارىزدار بولىپ تابىلادى.

كەرى قايتارىلعان تالاپ قويۋلاردا بار. كوپ جاعدايدا تالاپ قويۋ ارىزى تالاپ قويۋشىنىڭ كەرى قايتارىپ الۋ نەگىزىندە، ءىس اكىمشىلىك سوت ءىسىن جۇرگىزۋ تارتىبىمەن قاراۋعا جاتپاعانى ءۇشىن جانە ءىس وسى سوتتىڭ سوتتىلىعىنا جاتپاۋىنا بايلانىستى ءجيى كەرى قايتارىلعان.