پرەزيدەنت قاسىم-جومارت توقايەۆ ەلباسى نۇرسۇلتان نازاربايەۆتىڭ كانديداتۋراسىن ازياداعى ءوزارا ءىس-قيمىل جانە سەنىم شارالارى جونىندەگى كەڭەس جانىنداعى عۇلامالار كەڭەسىنىڭ باسشىسى لاۋازىمىنا ۇسىندى، دەپ جازادى sputnik.kz سايتى.
استانادا ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە مۇشە ەلدەردىڭ سىرتقى ىستەر مينيسترلەرىنىڭ كەزدەسۋى ءوتىپ جاتىر.
قازاقستاننىڭ سىرتقى ىستەر ءمينيسترىنىڭ ورىنباسارى اقان راحمەتۋلليننىڭ ايتۋىنشا، سەيسەنبىدە ەلدەر كەڭەس جانىنداعى كونسۋلتاتيۆتىك-كەڭەسشى ورگان – عۇلامالار كەڭەسى تۋرالى ەرەجەنى قابىلداۋعا ءتيىس.
– مۇشە مەملەكەتتەر عۇلامالار كەڭەسىن قۇرۋدى قولدادى جانە ۇمىتكەرلەردى ۇسىنا باستادى. بۇگىن ءبىز عۇلامالار كەڭەسى تۋرالى ەرەجە بەكىتەمىز. تاڭەرتەڭ بىزبەن كەزدەسۋ بارىسىندا پرەزيدەنت قاسىم-جومارت توقايەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەس قۇرىلتايشىسى نۇرسۇلتان نازاربايەۆتى عۇلامالار كەڭەسىنىڭ باسشىسى قىزمەتىنە ۇسىندى، سىزدەر بۇل كانديداتۋرانى بەكىتەسىزدەر دەپ ۇمىتتەنەمىن، – دەدى راحمەتۋللين كەزدەسۋگە قاتىسۋشىلارعا.
قاسىم-جومارت توقايەۆ2019 جىلى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ 5 سامميتىنە قاتىسقان. سول جيىندا عۇلامالار كەڭەسىن قۇرۋ ماسەلەسىن جان-جاقتى زەرتتەۋ ماڭىزدى ەكەنىن ايتتى.
– تۇراقتى جۇمىس ىستەيتىن ديالوگتى پلاتفورمانى قايتا قۇرۋ ارقىلى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ تالداۋ ورتالىقتارىنىڭ الەۋەتىن ارتتىرعان ءجون. كەڭەستىڭ جۇمىس ورگاندارىنا ارنالعان ۇسىنىستاردى جانداندىرۋعا مۇمكىندىك بەرەتىن عۇلامالار كەڭەسىن قۇرۋ ماسەلەسىن ۋاقىتىلى ءارى جان-جاقتى زەرتتەۋ كەرەك دەپ ەسەپتەيمىز، – دەدى قازاقستان پرەزيدەنتى.
پىكىر قالدىرۋ