شىمكەنتتەگى كۆازيمەملەكەتتىك سەكتور ۇيىمدارىندا كومپلاەنس قىزمەتتەرىنىڭ جۇمىسىن ۇيىمداستىرۋ بويىنشا «كومپلاەنس قىزمەتى - كۆازيمەملەكەتتىك سەكتورلارداعى سىبايلاس جەمقورلىققا قارسى ءىس-قيمىلدىڭ ءتيىمدى قۇرالى» تاقىرىبىندا سەمينار-جيىن ءوتتى.

سەمينارعا سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى باسشىسىنىڭ ءبىرىنشى ورىنباسارى ت.سەرىكبايەۆ، قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ شىمكەنت قالاسى بويىنشا فيليالىنىڭ ديرەكتورى ا.نىسانبايەۆ، قالالىق اقپاراتتىق-اعارتۋشىلىق شتابىنىڭ مۇشەسى ءا.احمەتوۆا، «شىمكەنت – ادالدىق الاڭى» جوبالىق كەڭسەسىنىڭ باسشىسى ج.قامبار، جەرگىلىكتى اتقارۋشى ورگاندارىنىڭ ۆەدومستۆولىق باعىنىستى ۇيىمدارىنىڭ كومپلاەنس-وفيسەرلەرى قاتىستى.

ونلاين شارا بارىسىندا تالعار سەرىكبايەۆ سىبايلاس جەمقورلىققا قارسى كۇرەستى كۇشەيتۋ جانە ونى بولدىرماۋدىڭ قازىرگى زامانعى ادىستەرىن قولدانۋ ماسەلەلەرى، ونىڭ ىشىندە كورپوراتيۆتىك سەكتور ءۇشىن دە مىندەت ەكەندىگىن جەتكىزدى.

«بۇگىنگى تاڭدا الەمدە كورپوراتيۆتىك پاراساتتىلىقتى قامتاماسىز ەتۋدىڭ نەگىزگى قۇرالى كومپلاەنستىڭ تاۋەلسىز قىزمەتتەرىنىڭ تاۋەكەلدەردى باسقارۋ جانە ىشكى باقىلاۋ شەڭبەرىندەگى ءتيىمدى قىزمەتى بولىپ تابىلادى.كومپلاەنس ماماندارىنىڭ نەگىزگى مىندەتتەرىنىڭ ءبىرى - قۇقىق بۇزۋشىلىقتاردىڭ الدىن الۋ جانە ۇيىمنىڭ ىسكەرلىك بەدەلىن قورعاۋ بولىپ تابىلادى» - دەدى ت.سەرىكبايەۆ.

ول باستى ۇستانىم كۆازيمەملەكەتتىك سەكتوردىڭ بارلىق ۇيىمدارىندا كومپلاەنس بولىمشەلەرىن قۇرۋ جانە ولاردىڭ ءتيىمدى قىزمەتى ەكەندىگىن اتاپ ءوتتى. سونىمەن قاتار، اكادەميانىڭ شىمكەنت قالاسى بويىنشا فيليالىنىڭ ديرەكتورى ا.نىسانبايەۆ سىبايلاس جەمقورلىققا قارسى كومپلاەنستىڭ ءتيىمدى جۇيەسىن قۇرۋعا، ەڭ الدىمەن ISO 37001 «پاراقورلىقپەن كۇرەس مەنەدجمەنتى جۇيەسى» حالىقارالىق ستاندارتى دەمەۋ بولاتىندىعىن جەتكىزدى. سونداي-اق، سپيكەر ISO 37001 ستاندارتى جانە ونىڭ نەگىزىندە سىبايلاس جەمقورلىققا قارسى كومپلاەنس قالاي قۇرۋعا بولاتىنى تۋرالى تولىق اقپارات بەردى.

جيىنعا قاتىسۋشىلاردىڭ پايىمداۋىنشا كومپانيالار اراسىندا سىبايلاس جەمقورلىققا قارسى كۇرەس كوممەرسيالىق تۇرعىدان ورىندى ەكەنىن تۇسىنۋشىلىك ارتىپ كەلەدى، ويتكەنى جەمقورلىق بيزنەس ءۇشىن بەدەلگە جانە قارجىلىق شىعىندارعا نۇقسان كەلتىرەدى.

ال، «شىمكەنت – ادالدىق الاڭى» جوبالىق كەڭسەسىنىڭ باسشىسى ج.قامبار پاراساتتىلىق قۇندىلىقتارىن دارىپتەۋ جايىندا ءسوز قوزعادى. كەزدەسۋ قورىتىندىسى بويىنشا سىبايلاس جەمقورلىق دەڭگەيىن تومەندەتۋگە جانە كورپوراتيۆتىك پاراساتتىلىقتى نىعايتۋعا باعىتتالعان بارلىق ۇسىنىستاردى شىمكەنت قالاسى بويىنشا سىبايلاس جەمقورلىققا قارسى قىزمەتى تولىق قولدايتىنى اتاپ ءوتىلدى.