شىمكەنت قالاسىنداعى «وڭتۇستىك» يندۋستريالدى ايماعى – رەسپۋبليكادا العاشقىلاردىڭ ءبىرى بولىپ اشىلعان ەكونوميكالىق الەۋەتتى كوتەرەتىن ايماقتاردىڭ بىرىنەن سانالادى. مۇندا سۇرانىسقا يە تاۋارلار وندىرەتىن باسەكەگە قابىلەتتى كاسىپورىندارمەن توپتاسقان. ولاردىڭ اراسىندا اسىرەسە، قۇرىلىس ماتەريالدارىن، وندىرىستىك ەلەكتر قۇرالدارىن، موتور مايىن جانە وزگە دە تاۋارلار وندىرەتىن زاماناۋي كاسىپورىندار بار.

مىسالى، ماشينا جاساۋ سالاسىندا ترانسفورماتورلار وندىرەتىن «Asia Trafo» جاۋاپكەرشىلىگى شەكتەۋلى سەرىكتەستىگىنىڭ جاڭا زاۋىتى ىسكە قوسىلعانىنا ءۇش جىل ەندى تولسا دا ونىمىنە دەگەن سۇرانىس ارتىپ كەلەدى. زاۋىت شۆەيساريا مەن گەرمانيانىڭ وزىق ەۋروپالىق زاماناۋي تەحنولوگيالىق جابدىقتارىن الدىرعان. ءوندىرىستى باسقارۋ جۇيەسى تولىعىمەن اۆتوماتتاندىرىلعان. كومپانيانىڭ ونىمدەرى بارلىق ەۋروپالىق ستاندارتتارعا سايكەس كەلەدى. وندىرىلگەن ونىمدەردىڭ 60 پايىزى ىشكى، ال، 40 پايىزى سىرتقى نارىققا جول تارتۋدا.

ايتا كەتۋ كەرەك، يندۋستريالدى ايماقتار – شىمكەنت ونەركاسىبىنىڭ تىرەگى سانالادى. مىسالى، 2010 جىلى بۇرىنعى فوسفور زاۋىتىنىڭ اۋماعىنانان سالىنعان ايماققا كولىك جانە ينجينەرلىك ينفراقۇرىلىم جەلىلەرىن جۇرگىزۋگە بيۋدجەتتەن 6 ميلليارد 800 ميلليون تەڭگە قارجى جۇمسالعان بولاتىن.
– بۇل قارجى ءوزىن اقتادى. 337 گەكتار اۋماقتا جاڭا ءوندىرىس ورىندارىن اشۋعا مۇمكىندىك الدىق. مۇنداي يندۋستريالدى ايماقتىڭ ارتىقشىلىعى كاسىپورىن اشۋدى جوسپارلاعان ينۆەستور تەك جەر تەلىمىن عانا تەگىن الىپ قويماي، سونىمەن قاتار ول ءوز كاسىپورنىنا ەلەكتر قۋاتى، گاز، سۋ، جول مەن تەمىر جول تۇيىعىن جەتكىزۋ ماسەلەسىنە دە باس قاتىرمايدى. وسىنداي ينفراقۇرىلىمىنىڭ بارلىعى ازىرلەنگەن جەر تەلىمىن الىپ، سول جەرگە ءوز زاۋىتىن سالا بەرۋىنە مۇمكىندىك جاسالدى، - دەيدى شىمكەنت قالالىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى بەرەكە دۇيسەبەكوۆ.