ەندى قالا تۇرعىندارى كاسسادا ءتولقۇجات نەمەسە كۋالىك ءۇشىن مەملەكەتتىك باجدى تولەۋدىڭ قاجەتى جوق. ويتكەنى، مۇنى QR-كود ارقىلى سمارتفوننىڭ كومەگىمەن ىسكە اسىرۋعا بولادى.
«بۇرىن QR كومەگىمەن جەر ۋچاسكەلەرىنە اكتىلەر دايىنداۋ جانە بەرۋگە، جىلجىمايتىن مۇلىككە قۇقىقتاردى، كوندومينيۋم وبەكتىلەرىن تىركەۋگە جانە جەر قاتىناستارى، جىلجىمايتىن جانە جىلجىمالى مۇلىك سالاسىنداعى قىزمەتتەرگە، سونداي-اق زاڭدى تۇلعالاردى مەملەكەتتىك تىركەۋگە بايلانىستى مەملەكەتتىك قىزمەتتەردى تولەۋگە بولاتىن. ءقازىردىڭ وزىندە 50-دەن استام كليەنت QR-كودتىڭ كومەگىمەن ءتوقۇجاتتى نەمەسە كۋالىكتى رەسىمدەۋدى تولەدى»، – دەدى «ازاماتتارعا ارنالعان ۇكىمەت» مەملەكەتتىك كورپوراسياسى شىمكەنت قالاسى بويىنشا فيليالىنىڭ باسپا ءسوز حاتشىسى التىناي تاتايەۆا.
QR-كود ارقىلى تولەمدى قالادىعى بارلىق 10 حقو-دا جۇزەگە اسىرۋعا بولادى. حقو-عا جۇگىنگەن كەزدە كليەنتتەر مەملەكەتتىك باجدى Homebank جانە Kaspi قوسىمشالارىنداعى QR-كود ارقىلى تولەي الادى.
2021 جىلدىڭ سەگىز اي ىشىندە شىمكەنت قالاسىنىڭ حقو-لارى ءتولقۇجاتتار مەن جەكە كۋالىكتەردى بەرۋ بويىنشا 13 818 مىڭ مەملەكەتتىك قىزمەت كورسەتىلدى. جەكە كۋالىك ءۇشىن مەملەكەتتىك باج مولشەرى 584 تەڭگە، ءتولقۇجات ءۇشىن – 23 336 تەڭگەنى قۇرايدى.
مەملەكەتتىك قىزمەتتەردى QR-كودتىڭ كومەگىمەن تولەۋ العاش رەت 2020 جىلعى قاراشادا ىسكە قوسىلدى. جالپى ايتقاندا، مەملەكەتتىك كورپوراسيا 662 مەملەكەتتىك قىزمەت ءتۇرىن كورسەتەدى. سونداي-اق، QR-كود ءاربىر قىزمەت بويىنشا جانە ءاربىر كليەنت ءۇشىن جەكە قالىپتاستىرىلادى.
پىكىر قالدىرۋ