وڭىرىمىزدە وتكەن جارتى جىلدىقتىڭ قورىتىندىسى بويىنشا مەملەكەتتىك كىرىستەر جوسپارى ارتىعىمەن ورىندالعان. ءبىر عانا ءال-فارابي اۋدانىندا مەجەلەنگەن مەملەكەتتىك بيۋدجەت جوسپارى 107 پايىزعا توقتالىپ، ەسەپتى مەرزىمدە بيۋدجەتكە 1 ميلليون 914 مىڭ تەڭگە ارتىق قامتاماسىز ەتىلدى.

وسى جانە وزگە دە ماسەلەلەر شىمكەنت قالاسى ءال-فارابي اۋدانى بويىنشا مەملەكەتتىك كىرىستەر باسقارماسىنىڭ 2021 جىلدىڭ 1 جارتىجىلدىق قورىتىندىسى بويىنشا اتقارىلعان جۇمىستار تۋرالى باياندالعان بريفينگتە ءمالىم بولدى.

ماماندار، شىمكەنت مەگاپوليس اتانعالى كىرىستەر كوزى ۇلعايعانىن ايتادى. قازىرگى تاڭدا ءال-فارابي اۋدانى بويىنشا مەملەكەتتىك كىرىستەر باسقارماسىندا 7401 زاڭدى تۇلعالار، 186 223 جەكە تۇلعالار تىركەلگەن. جاۋاپتىلار، جەكە تۇلعالاردىڭ مۇلىك سالىعى بويىنشا اعىمداعى جىلدىڭ 1 قازانىنا دەيىن تولەم جۇرگىزۋدى ەسكە سالادى. مەرزىمىندە تولەنبەگەن جاعدايدا، سالىق كودەكسىنىڭ 128 بابىنىڭ نەگىزىندە جەكە تۇلعانىڭ بەرەشەگىن ءوندىرىپ الۋ تۋرالى سالىق بۇيرىعى شىعارىپ، ماجبۇرلەپ ورىنداتۋ ءۇشىن جەكە سوت ورىنداۋشىلارىنا جىبەرىلەدى.

سونداي-اق، بيۋدجەت الدىندا 1 تەڭگە قارىزىڭىز بولعان جاعدايدا بانكتىك ەسەپ شوتتارىڭىز ارقىلى قارجىلىق وپەراسيالاردى جۇرگىزۋ، اقشا شەشۋ، بانكتىك ەسەپ شوت اشۋ، دەپوزيت شوتتارىن اشۋ، تاۋارلاردى ءبولىپ تولەۋ ارقىلى ساتىپ الۋ، تۇتىنۋشىلىق نەسيلەر راسىمدەۋ جانە تاعى دا سول سياقتى وپەراسيالار جۇرگىزە المايتىندىعىن ەسكەرتەدى.