شىمكەنت قالاسى اۋماعىندا جىلىتۋ ماۋسىمىنا دايىندىق شارالارى قىزۋ جۇرگىزىلۋدە. جەرگىلىكتى بيلىك پەن توتەنشەلىكتەردەن قۇرىلعان ءموبيلدى توپ وكىلدەرى قوعامدىق كولىكتەرگە ءمىنىپ جولاۋشىلارعا ۇگىت ناسيحات جۇمىستارىن جۇرگىزدى.
تۇرمىستاعى قاۋىپسىزدىك شارالارىن ساقتاۋعا شاقىرعان توتەنشەلىكتەر تۇسىندىرمە جۇمىستارىن قالالىق قوعامدىق كولىكتەردە جۇرگىزۋدە. جىلىتۋ ماۋسىمى قارساڭىندا بۇل جۇمىستار كۇشەيە تۇسكەن. سەبەبى وقىس وقيعانىڭ الدىن الۋ قاشاندا ماڭىزدى دەيدى ماماندار.
گازدان يىستەنۋدىڭ جانە ءورتتىڭ الدىن الۋ ماقساتىندا توتەنشەلىكتەر تاراپىنان ارنايى ۆيدەوماتەريال دايىندالىپ SHYMKENT BUS ج ش س قاراماعىنداعى 150 اۆتوبۋستىڭ جانە ساۋدا ۇيلەرىندە ورنالاسقان لەد ەكرانداردا كورسەتىلۋدە.
بۇدان بولەك سالاعا جاۋاپتىلار قالا اۋماعىندا الەۋمەتتىك تۇرعىدا از قامتىلعان 40 وتباسىنىڭ ۇيىنە دابىل قاققىشتار ورناتقان. ءيىستى گاز شىققان بويدا دابىل قاعىلىپ اۆتوماتتى تۇردە گاز ەسەپتەگىش وشىرىلەدى. ال قالا تۇرعىندارىنىڭ باسىم كوپشىلىگى ساقتىق شارالارىن ۇستاناتىنىن ايتىپ، بۇلدىرشىندەردى گاز قۇرىلعىلارىنا جولاتپايتىنىن جانە مۇرجالاردى ۋاقىتىلى تازرتىپ تۇرۋ ماڭىزدى ەكەنىن ايتادى.
ايتا كەتەيىك اعىمداعى جىلعى 8 ايدىڭ قورىتىندىسى بويىنشا جالپى شىمكەنت قالاسىندا 116 ءورت تىركەلگەن بىلتىرعى جىلمەن سالىسىتىرعاندا 8 %-عا ازايعان. ماتەريالدىق شىعىن كولەمى 420 ملن. 655 مىڭ تەڭگەنى قۇراعان.قازا تاپقاندار جوق. 2 ادام جاراقات العان. ءۇي جاعدايىندا قاۋىپسىزدىك شارالارىن ساقتاۋعا شاقىرادى ماماندار.
پىكىر قالدىرۋ