شىمكەنتتە قىس ماۋسىمىنا دايىندىق جۇمىستارى قىزىپ تۇر. وسى كەزدە اتقارىلعان شارۋالار ۇلكەن اپاتتى اۋىزدىقتايدى. سوندىقتان جاۋاپتى ماماندار جۇمىلا ىسكە كىرىسكەن. ءقاۋىپتىڭ الدىن الۋ ماقساتىندا ءتيىستى سالا باسشىلارى باس بىرىكتىرىپ باسپا ءسوز بريفينگىن ۇيىمداستىردى.
2020-2021 جىلعى جىلۋ بەرۋ ماۋسىمىندا قالاداعى تۇرعىن ۇيلەردە 61 ءورت تىركەلگەن. ماتەريالدىق شىعىن 132 ملن. تەڭگەنى قۇرادى. سالدارىنان 2 ادام قايتىس بولىپ، 4 ادام جاراقات العان. تىركەلگەن ورتتەردىڭ باسىم بولىگى ەلەكتر جابدىقتارىن مونتاجداۋ جانە پايدالانۋ سالدارىنان ورىن الىپتى. ونىڭ ىشىندە گازدان ۋلانۋ فاكتىلەرىدە بار.
ۋلانۋ وقيعالارى تۇرمىستىق گاز قۇرىلعىلارىن پايدالانۋ كەزىندە ءورت قاۋىپسىزدىگى تالاپتارىن بۇزۋدان ورىن العان. دەسەكتە سول قۇرىلعىلاردى ورناتقان جانە تەكسەرگەن ءتيىستى مەكەمەلەر جاۋاپتان جالتارادى ەكەن. قۇرىلعىنىڭ قاۋىپسىزدىگىنە قۇجات بەرگەن مەكەمەلەر جاۋاپتى ساتتە تاسادا قالادى. كەيبىرى تۇرعىن ۋي يەسىنەن قىزمەتى ءۇشىن اقشا العانمەن تەكسەرۋگە كەلمەيدى ەكەن. وسى ماسەلە بۇگىنگى تاڭدا وزەكتى.
تجد قىزمەتكەرلەرىمەن حالىقتىڭ اراسىندا قاۋىپسىزدىك مادەنيەتىن قالىپتاستىرۋ ماقساتىندا ۇگىت-ناسيحات جۇمىستارى جۇرگىزىلۋدە. ءىس-شارا بارىسىندا گاز جانە گازبەن جابدىقتاۋ سالاسىنداعى وبەكتىلەردە ءورت قاۋىپسىزدىگىنىڭ جاي-كۇيى جانە قامتاماسىز ەتىلۋى ەسكەرتىلەدى.
گاز جانە گازبەن جابدىقتاۋ سالاسىنداعى وبەكتىلەردە ونەركاسىپتىك قاۋىپسىزدىك جانە تۇرمىستا گازدى پايدالانۋ كەزىندە قاۋىپسىزدىك تالاپتارىنىڭ ساقتالۋى؛گازبەن بايلانىستى ۋلانۋ جاعدايلارى تۋرالى جانە ولاردىڭ الدىن الۋ شارالارى؛ گاز تۇتىنۋ جۇيەلەرىنە تەحنيكالىق قىزمەت كورسەتۋدى جۇرگىزۋ كەزىندە تالاپتاردىڭ ساقتالۋى تۋرالى تۇسىندىرمە جۇمىستارى جۇرگىزىلۋدە.
