بۇگىن «Nur Otan» پارتياسى شىمكەنت قالاسى فيليالى ءتوراعاسىنىڭ ءبىرىنشى ورىنباسارى جانار بەكتايەۆا «ابادان» باستاۋىش مەكتەبىنىڭ اشىلۋ سالتاناتىنا قاتىستى.

552 وقۋشىنى قامتيتىن، 2 تىلدە ءبىلىم بەرەتىن زامان تالابىنا ساي جابدىقتالعان مەكتەپتە وقۋشىلاردى دامىتاتىن ءتۇرلى ۇيىرمەلەر مەن قوسىمشا ساباقتار قاراستىرىلعان.

«Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» اتتى 2021-2025 جىلدارعا ارنالعان سايلاۋ باعدارلاماسىندا شىمكەنت قالاسى بويىنشا ءبىلىم وشاقتارىنىڭ سالىنۋى مەن ونداعى بالالاردىڭ ءبىلىم الۋىنا باسىمدىقتار بەرىلگەن.

قالامىزداعى 19 ءۇش اۋىسىمدى مەكتەپتىڭ ماسەلەسىن شەشۋ جولىندا پارتيا قارقىندى جۇمىس جۇرگىزۋدە. جەكەمەنشىك مەكتەپتەردىڭ كوپتەپ اشىلۋى - ءبىلىم ساپاسىن ارتتىرۋدا وڭ سەرپىن بەرىپ، مەكتەپ تاپشىلىعىن جويۋعا باستى قادام بولماق. بۇگىن بىرنەشە مەكتەپتىڭ پايدالانۋعا بەرىلۋى ناقتى ىستەردىڭ كورسەتكىشى.

«ءبىلىم كۇنى - حالىقتىق مەرەكە! ءاربىر ادام ءۇشىن بۇل مەيرام ەرەكشە ىستىق، ءارى ماڭىزدى. اسىرەسە، مەكتەپ تابالدىرىعىن تۇڭعىش اتتايتىن بۇلدىرشىندەردىڭ جۇرەگىندە بۇگىنگى كۇن ماڭگىگە ساقتالادى. ولار ءۇشىن بۇل ساۋلەلى ءسات قانا ەمەس، سونىمەن قاتار جارقىن بولاشاعىنا جاسايتىن ماڭىزدى قادام. بۇگىنگى اشىلىپ وتىرعان “ابادان” باستاۋىش مەكتەبى زامان تالابىنا ساي جاڭاشا جۇمىس ىستەپ، ناعىز ءبىلىمنىڭ ورداسى بولادى دەگەن ويدامىن. وسىندا وقيتىن وقۋشىلاردىڭ ءبىلىم دەڭگەيى جاھاندىق سۇرانىسقا ساي جانە باسەكەگە قابىلەتتى بولىپ، ەلىمىزدىڭ وركەندەۋىنە ۇلەس قوسار مىقتى ازاماتتاردى تاربيەلەرىنە كامىل سەنەمىن!»، – دەدى جانار الىبەك قىزى ءوز قۇتتىقتاۋ سوزىندە.

بيىل شىمكەنتتە 203 مەكتەپ ءداستۇرلى فورماتتا ءبىلىم بەرۋ ءۇشىن ەسىكتەرىن ايقارا اشتى. سونداي-اق، 25،5 مىڭ ءبۇلدىرشىن مەكتەپ تابالدىرىعىن اتتاپ، بولاشاققا العاشقى قادام جاسادى.

ءاربىر مەملەكەتتىڭ بولاشاعى، دامۋى ءبىلىمدى، دەنساۋلىعى مىقتى، مادەنيەتتى ازاماتتارىنا بايلانىستى. سوندىقتان ءبىلىم ساپاسىن كوتەرۋ – پارتيانىڭ باستى نازارىندا.