سەنات دەپۋتاتى اقىلبەك كۇرىشبايەۆ ءبىلىم گرانتتارىن تاعايىنداۋ مەن شاكىرتاقى تولەۋ ءتارتىبىن وزگەرتۋگە بايلانىستى ۇكىمەت باسشىسىنا ۇسىنىس جاسادى.

سەناتوردىڭ ايتۋىنشا، تۇرمىسى تومەن وتباسىلاردان شىققان كوپتەگەن دارىندى بالا جوعارى بىلىمنەن تىس قالىپ وتىر. اۋىلدا پەداگوگ تاپشىلىعى ءالى دە بار. ءبىر ءمۇعالىم فيزيكا، ادەبيەت جانە مۋزىكانى وقىتا بەرەدى. اۋىلداعى مەكتەپتىڭ ماتەريالدىق-تەحنيكالىق بازاسى دا ءماز ەمەس. ال ساۋالناما كەزىندە اۋىل بالالارىنىڭ بىرەۋى دە ينتەرنەت جاقسى ىستەيدى دەپ ايتپاعان. سونىڭ سالدارىنان كوبىسى مەملەكەتتىك گرانتقا وتپەي جاتادى، ال اقىلى بولىمگە تۇسەتىن اقشاسى جوق.

– پارلامەنت دەپۋتاتتارى ءبىلىم جانە عىلىم مينيسترلىگىنىڭ الدىندا اۋىل مەكتەپتەرىنىڭ تۇلەكتەرىنە اگرارلىق ماماندىقتارعا ءتۇسۋ ءۇشىن اۋىلدىق كۆوتانى 30 پايىزدان، كەم دەگەندە، 50 پايىزعا دەيىن ارتتىرۋ ماسەلەسىن كوتەرىپ كەلەدى. ءبىراق بۇل ماسەلە تاباندى تۇردە شەشىلمەي وتىر، – دەيدى ول. 

كۇرىشبايەۆتىڭ ايتۋىنشا، دامىعان ەلدەردە جوعارى وقۋ ورىندارىندا الەۋمەتتىك وسال توپتار ءۇشىن وقۋ قۇنى بولەك ەسەپتەلەدى.

– شەتەلدە وقۋدى تولەۋدىڭ ەكى ءتۇرى بار. بارلىعى ءۇشىن شارتتى قۇن جانە الەۋمەتتىك وسال توپتارداعى ستۋدەنتتەرگە ارنالعان وقۋدىڭ ارنايى قۇنى. سونىمەن قاتار كوپتەگەن ۋنيۆەرسيتەتتە ستيپەنديا تاعايىنداۋدىڭ باستى تالابى جاي عانا ۇلگەرىم ەمەس، وتباسىنىڭ تابىس دەڭگەيى دە ەسكەرىلەدى. وسىنداي جانە باسقا دا باعدارلامالاردىڭ نەگىزىندە بۇل مەملەكەتتەردە الەۋمەتتىك جانە ماتەريالدىق جاعدايىنا قاراماستان، وقيمىن دەگەن جانە ىرىكتەۋدەن وتكەن بارلىق جاسقا جوعارى ءبىلىم الۋعا مۇمكىندىك بەرىلگەن، – دەدى دەپۋتات. 

قازاقستاندا گرانت ۇبت ناتيجەسى بويىنشا بەرىلەدى. ال الەۋمەتتىك وسال توپتاردىڭ كۆوتاسى 5 پايىزدان اسپايدى.

– ەلىمىزدىڭ ءبىلىم گرانتتارىن ءبولۋ جۇيەسىنە وزگەرىس ەنگىزەتىن ۋاقىت جەتتى. مەملەكەتتىك گرانتتار مەن ستيپەنديالاردى تەستىلەۋ ناتيجەسى مەن ۇلگەرىمنىڭ نەگىزىندە عانا ەمەس، سونداي-اق، مەملەكەتتىڭ قولداۋىنسىز وقي المايتىندارعا الەۋمەتتىك كومەك كورسەتۋ ماقساتىندا بولگەن ءجون. بۇل شارالار تۇرمىسى تومەن وتباسىلاردان شىققان جاستاردىڭ مانساپتىق وسۋىنە الەۋمەتتىك ليفت بولادى، – دەدى كۇرىشبايەۆ.

وسىعان بايلانىستى سەناتتىڭ ءبىر توپ دەپۋتاتى ۇكىمەت باسشىسىنا رەسمي ساۋال جولداپ، جازباشا تۇردە جاۋاپ بەرۋدى سۇرادى.