سەمەيدە مۇعالىمدەردى كوشە سىپىرۋعا جىبەرگەن لاۋازىمدى تۇلعالار اكىمشىلىك جاۋاپقا تارتىلدى. ولاردىڭ اراسىندا قالا اكىمىنىڭ ورىنباسارى دميتريي گاريكوۆ تا بار، دەپ حابارلادى ءبىلىم جانە عىلىم مينيسترلىگىنىڭ باسپا ءسوز قىزمەتى.

بۇعان قوسا، مينيسترلىك اكىم ورىنباسارىنا قاتىستى تارتىپتىك شارا قولدانۋ تۋرالى حات جولداعان.

ءبىلىم مينيسترلىگىنىڭ قىزمەتكەرلەرى اكىمشىلىك ءىستى قارادى. تەكسەرىس بارىسىندا سەنبىلىككە №43 مەكتەپتىڭ مۇعالىمدەرىنەن بولەك، №9 مەكتەپتىڭ مۇعالىمدەرى دە جىبەرىلگەنى انىقتالدى.

"مۇعالىمدەر قالانى اباتتاندىرۋ جۇمىستارىنا سەمەي قالاسى اكىمىنىڭ ورىنباسارى دميتريي گاريكوۆتىڭ حاتى نەگىزىندە شىققان. حاتتا ۇستازداردىڭ سەنبىلىككە تاڭعى ساعات 09.00-دا شىعۋىن قامتاماسىز ەتۋ تاپسىرىلعان. ءار مەكتەپكە اۋماقتى تازارتۋ جۇمىستارىن جۇرگىزۋ ءۇشىن بەلگىلى ءبىر ۋچاسكە بەرىلگەن. تاپسىرمانىڭ ورىندالۋىن باقىلاۋ اكىمدىكتەگى بولىمشەلەردىڭ بىرىنە جۇكتەلگەن" دەلىنگەن حابارلامادا.

وسىدان كەيىن ءبىلىم مينيسترلىگى وبلىستار مەن رەسپۋبليكالىق ماڭىزى بار قالالاردىڭ اكىمدىكتەرىنە مۇعالىمدەردى قىزمەتىنەن تىس جۇمىستارعا تارتۋعا، وقۋ پروسەسىنە كەدەرگى كەلتىرۋگە بولمايتىنى تۋرالى حات جولداندى. سەبەبى بۇل "پەداگوگ مارتەبەسى تۋرالى" زاڭعا قايشى كەلەدى.

"سەمەي قالاسى ءبىلىم ءبولىمىنىڭ باسشىسى ناتاليا فەسەنكو سوگىس الدى جانە اكىمشىلىك جازاعا تارتىلدى. №9 ورتا مەكتەپتىڭ ديرەكتورى ن.ۆ. تەگاي مەن №43 ورتا مەكتەپ ديرەكتورىنىڭ مىندەتىن اتقارۋشى ا.ۆ. يسكرينا دا اكىمشىلىك جاۋاپكەرشىلىككە تارتىلدى" دەدى ۆەدموستۆو.

ەسكە سالساق، 16 قازاندا الەۋمەتتىك جەلىدە سەمەيدىڭ №43 مەكتەبىندە وقۋ پروسەسىنە كەدەرگى كەلتىرىپ، مۇعالىمدەردى سەنبىلىككە كوشە سىپىرۋعا جىبەرگەنى تۋرالى اقپارات تارادى. ءبىلىم ءمينيسترى اسحات ايماعامبەتوۆ مەكتەپتەگى ساباقتاردى توقتاتىپ، مۇعالىمدەردى كوشە سىپىرۋعا جىبەرگەندەر جازالاناتىنى تۋرالى جازعان بولاتىن.

كەيىن سەمەي قالاسىنىڭ باسشىلىعى مينيسترگە تازالىق بۇكىل قالادا بولعانىن ايتىپ، ساباقتاردىڭ توقتاتىلماعانىن، ونلاين فورماتتا جۇرگەنىن ايتقان.