نۇرسۇلتان نازاربايەۆ پرەزيدەنت رەتىندەگى وكىلەتتىگىن توقتاتۋى سەبەپتەرىنىڭ ءبىرى   ومىرتقاسىنا جاساتقان وتامەن بايلانىستى ەكەنىن ايتتى. بۇل تۋرالى   "شتريحي ك پورترەتۋ. وتكروۆەنيە" دەرەكتى فيلمىندە بەرگەن سۇحباتىندا حابارلادى.

– ءقازىر بۇرىن ەشقايدا ايتپاعان دۇنيەنى ايتايىن. مەن ومىرتقاما، بەلىمە  وتە كۇردەلى وتا جاساتتىم. 2011 جىلى  8 ناۋرىزدا  كونسەرتتە وتىرعانبىز. كونسەرت ءبىتتى، ورنىمنان تۇردىم. ءبىتتى، اياعىمدى باسا المايمىن. بىردەڭە بولدى. كۇزەت وفيسەرىن شاقىردىم دا، "قاسىما تۇر" دەدىم. ادامدار بايقاماۋى ءۇشىن ونىڭ قولىنان تاياق ۇستاعانداي ۇستاپ الىپ ءجۇردىم. زال لىق تولى. مىنە، وسىلاي بولدى"، - دەدى نازاربايەۆ "شتريحي ك پورترەتۋ. وتكروۆەنيە" دەرەكتى فيلمىندە بەرگەن سۇحباتىندا.

ونىڭ ايتۋىنشا، ساراپتاما كەزىندە ومىرتقاسىندا اقاۋ بارى بەلگىلى بولعان. كەيىن وتا جاساتقان.

– بالا كەزىمدە قىزىل وترياد كومانديرى تۋرالى فيلم كورگەنمىن. ول جارالانادى، ال وترياد شابۋىلعا شىعۋى كەرەك. ءبىراق ول قولىن تاڭىپ، پالتوسىن كيىپ، جاساق الدىندا تۇرۋى كەرەك بولدى. پرەزيدەنت تە سونداي. پرەزيدەنت ناۋقاس بولسا، ول مەملەكەتتى باسقارا المايدى. جاعدايى قيىن بولسا، ەلدىڭ جاعدايى قانداي بولادى؟ ەل قينالۋى كەرەك پە؟ ەل ارالاپ، كەزدەسۋ وتكىزۋدى جالعاستىرۋى كەرەك، 350 كەزدەسۋ. ال دەنساۋلىق جاراماسا قالاي كەزدەسۋ وتكىزەسىز؟

2011 جىلى بولاتىن. ودان كەيىن دە ەمدەلۋگە تۋرا كەلدى، ول كۇردەلى وتا ەدى. ماعان تاجىريبەلى، جاقسى حيرۋرگ كەزدەستى. بۇل دا ماڭىزدى شەشىم شىعارۋىما سەبەپ بولدى. بۇل تۋرالى ەشقاشان ايتقان ەمەسپىن. مۇنى قالاي ايتامىن جانە قالاي جۇمىس ىستەيمىن؟ كەتۋ كەرەك. ءبىراق كەتۋگە دايىن بولمادىم، ويتكەنى ءىزباسار ماسەلەسى شەشىلمەدى، – دەدى نازاربايەۆ.

ول بيلىكتەن كەتكەنىنە ەكى جىلدان اسا ۋاقىت وتكەننەن كەيىن دە تاڭداۋىنا وكىنبەيتىنىن ايتتى.

– وسى جاعدايدان كەيىن، ەشقاشان اۋىرعان ەمەسپىن، ءقازىر دە اۋىرمايمىن، – دەپ قوستى ول.

نۇرسۇلتان نازاربايەۆ 2019 جىلعى 19 ناۋرىزدا پرەزيدەنت رەتىندەگى وكىلەتتىگىن توقتاتقان. الايدا نۇروتان پارتياسى مەن قاۋىپسىزدىك كەڭەسىنىڭ ءتوراعاسى رەتىندە بيلىككە ىقپال ەتە الادى.