شىمكەنتتە العاش رەت ەلىمىزدەگى بالالار ءۇيىنىڭ تاربيەلەنۋشىلەرىنىڭ «مەيىرىم مەكەنىندە» اتتى ونەر كەشى ءوتتى.

ق ر تاۋەلسىزدىگىنىڭ 30 جىلدىعىنا وراي ۇيىمداستىرىلعان سالتاناتتى شاراعا ەلىمىزدەگى بالالار ءۇيىنىڭ 84 تاربيەلەنۋشىسى ونەر كورسەتتى.

اۋەندى كەشكە شىمكەنت قالاسىنىڭ اكىمى مۇرات ايتەنوۆ جانە قالا ءماسليحاتىنىڭ دەپۋتاتتارى قاتىستى.

– بۇگىنگى يگى شارا تاۋەلسىزدىگىمىزدىڭ 30 جىلدىعى قارساڭىندا قازاقستاندا العاش رەت ۇيىمداستىرىلىپ وتىر. ەلىمىزدە بالالار ۇيلەرى بولماسىن. بۇل باعىتتا ەل بولىپ جۇمىس جاساۋىمىز كەرەك. بۇلدىرشىندەرىمىز ەل ازاماتى بولىپ ءوسسىن. سىزدەردىڭ جەتىستىكتەرىڭىزگە كۋا بولىپ جۇرە بەرەيىك،-دەدى قالا اكىمى.

بالالاردىڭ شىعارماشىلىعىن قولداۋ ءۇشىن ەلىمىزگە بەلگىلى ونەر مايتالماندارى بەكجان تۇرىس، زاتتىبەك كوپبوسىن ۇلى، ناركەنجە جانە تاڭات مامىرحان ۇلى قاتىسىپ، جاس دارىندىلارمەن ساحنادا دۋەت ورىندادى.

قالا اكىمدىگى تاراپىنان بۇگىنگى كەشتىڭ بارلىق قاتىسۋشىسىنا باعالى سىيلىقتار تابىستالدى. سونىمەن بىرگە، وقمۋ جوعارى وقۋ ورنى اۋەندى شارانىڭ 1 قاتىسۋشىسىنا وقۋ گرانتىن بولەتىنىن حابارلادى.

– تاربيەلەنۋشىلەر اراسىندا شىعارماشىل، ءبىلىم مەن عىلىمعا جاقىن، ونەردە وزا شاۋىپ جۇرگەندەر بار. ولاردى ناسيحاتتاپ، قولداۋ قاجەت-اق. اتا-انانىڭ قامقورلىعىن كورمەسە دە، ومىرگە قۇشتار. بۇگىن دارىندى بالالاردى كوپشىلىككە تانىستىرىپ، ولاردىڭ قوعامنان تىس قالماعانىن سەزىندىرۋدى كوزدەدىك،-دەيدى جوبا جەتەكشىسى اقبايان ساپاربەكوۆا.

وسى جوبا شەڭبەرىندە جەتكىنشەكتەر شىمكەنت قالاسىنىڭ كورىكتى جەرلەرىن تاماشالاپ، تاريحي ورىندارىمەن تانىسادى.

شىمكەنت قالاسى اكىمدىگىنىڭ باسپا ءسوز قىزمەتى