ورتالىق ازيا جانە كاۆكاز ەلدەرىنىڭ عىلىمي جانە ءبىلىم بەرۋ الەۋەتىن ارتتىرۋعا ارنالعان ءىىى Nobel Fest فورۋمىنىڭ ەكىنشى كۇنىندە «بولاشاق قالالارى: ادامزات قايدا ءومىر سۇرمەك؟» سەكسياسىنىڭ جۇمىسىنا شىمكەنت قالاسىنىڭ اكىمى مۇرات ايتەنوۆ سپيكەر رەتىندە قاتىسىپ، قالالاردىڭ بولاشاعى مەن دامۋ تەندەنسياسى جونىندە پىكىرىن ءبىلدىردى.

قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆ ۇسىنعان G-Global يدەياسى عالامدىق تەڭگەرىمدى ساقتاۋعا قىزمەت ەتەدى. دۇنيەجۇزىنە تانىلعان اقپاراتتىق-كوممۋنيكاسيالىق الاڭنىڭ ۇسىنىسىمەن نوبەل فەستيۆالىنىڭ مىنبەرىنەن ەلىمىز اتىنان ءسوز الۋ مارتەبەسى شىمكەنت قالاسىنا بەرىلدى.

«بولاشاق بۇگىننەن باستالادى» ايدارىمەن ءوتىپ جاتقان فورۋمدا قازاقستان مەگاپوليستەرىنىڭ اتىنان شىمكەنت قالاسىنا ءسوز بەرۋ مارتەبەسى ۇلكەن سەنىم ەكەنىن جەتكىزگەن مۇرات دۇيسەنبەك ۇلى، ءححى عاسىر – يننوۆاسيالار مەن تەحنولوگيالار ءداۋىرى ەكەنىن ايتتى.
«بولاشاق قالالارى شەكتەن تىس ورتالىقتاندىرۋدان ارىلادى. باسىمدىق ەكولوگياعا، جاسىل ەكونوميكاعا، اقىلدى تەحنولوگيالارعا جانە كرەاتيۆتى يندۋسترياعا بەرىلەدى»،- دەدى م.ايتەنوۆ.

قالالاردىڭ بولاشاقتاعى دامۋ تەندەسياسىن ايتقان قالا باسشىسى، مەگاپوليستەردە ءاربىر اۋدان دەربەس وركەندەپ، تەڭگەرىمدى دامۋ جولىنا تۇسەتىندىگىن حابارلادى. جاسىل تەحنولوگيالار بولاشاق قالالارىنىڭ نەگىزگى دامۋ باعىتى بولىپ ايقىندالماق. ەكولوگياعا زيان تيگىزۋ ۇدەرىستەرى بىرتىندەپ جويىلىپ، ەلەكتر قۋاتىمەن جۇرەتىن كولىكتەرگە باسىمدىق بەرىلەدى. كولىك قوزعالىسىنا تىيىم سالىنعان اۋماقتار كولەمى ارتا بەرمەك.

بولاشاق قالالارىنىڭ ەكولوگيالىق تازا، قولايلى، ۇنەمدى بولۋىنا يننوۆاسيالىق تەحنولوگيالار ىقپال ەتەتىن بولادى. جوعارى تەحنولوگيالار Big Data (اۋقىمدى دەرەكتەر)، جاساندى ينتەللەكت قالالىق ورتانىڭ ساپاسىن ارتتىرۋعا قىزمەت ەتپەك. كرەاتيۆتى يندۋستريانى ەندىرۋدە بولاشاق قالالارىنىڭ تۇرعىندارى جاڭا ۇتىمدى يدەيالار ۇسىنىپ، ءومىر ءسۇرۋ ساپاسىن كوتەرۋگە ۇمتىلاتىن بولادى.

«شىمكەنت قالاسىن اتالعان باعىتتار بويىنشا دامىتۋدى ىسكە اسىرىپ كەلەمىز. بۇگىننىڭ وزىندە قالا ينفراقۇرىلىمىن جەتىلدىرۋ، ادام كاپيتالىن دامىتۋ، ينۆەستيسيالىق احۋالدى جاقسارتۋ، قالا قاۋپسىزدىگىن ساقتاۋ بويىنشا اۋقىمدى جۇمىستار اتقارىلۋدا. قالانىڭ بارلىق سالالارىندا جاڭا تەحنولوگيالار ەنگىزۋدى قولعا الدىق، يندۋستريالدى ايماقتاردى قالا سىرتىنا ورنالاستىرۋدامىز، اۋماقتارعا ينجەنەرلىك جەلىلەر جۇرگىزىپ، جاڭا جولدار سالىپ جاتىرمىز. شەكتەن تىس ورتالىقتاندىرۋدان باس تارتىپ، ءار اۋداندى تەڭدەي دامىتۋعا باسىمدىق بەردىك»، - دەپ ءسوزىن تۇيىندەگەن مۇرات دۇيسەنبەك ۇلى، فورۋم قاتىسۋشالىرىن شىمكەنت قالاسىنا مەيمان بولىپ كەلۋگە شاقىردى.