الداعى ۋاقىتتا جۇرگىزۋشى كۋالىگىن الۋعا ارنالعان ەمتيحانداردا بيومەتريالىق سايكەستەندىرۋ جۇيەسى جۇمىس ىستەيدى. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ونلاين بريفينگتە ءمالىم ەتتى.
ونىڭ ايتۋىنشا، مامانداندىرىلعان حقكو-لاردا جۇرگىزۋشى كۋالىگىن ەمتيحانسىز الۋ فاكتىلەرى بار. وسىعان بايلانىستى سىناققا كەلەتىن ادامدى تەكسەرۋ شارالارى كۇشەيتىلەدى.
– الداعى ۋاقىتتا جۇرگىزۋشى كۋالىگىن الۋعا ارنالعان ەمتيحانداردا بيومەتريالىق سايكەستەندىرۋ جۇيەسىن ەنگىزۋ جوسپاردا بار. اتاپ ايتقاندا، تەوريالىق ەمتيحانعا كىرەردىڭ الدىندا جانە ەمتيحان ۇستىندە تەكسەرىس جاسالادى. بۇدان بولەك، پراكتيكالىق ەمتيحاندا دا تۋرا سونداي تەكسەرىس بولادى، – دەدى مۋسين ورتالىق كوممۋنيكاسيالار قىزمەتىندە وتكەن ونلاين بريفينگتە.
باعدات مۋسين سوڭعى رەت 24 قازاندا ەلورداداعى مامانداندىرىلعان حالىققا قىزمەت كورسەتۋ ورتالىعىندا بولىپ، سىبايلاس جەمقورلىق كورىنىستەرىن انىقتاعانىن اتاپ ءوتتى.
– قازىرگى كەزدە ءبىز ءتيىستى شارالاردى قولعا الىپ جاتىرمىز. توسقاۋىل قويىلدى. ماسەلەن كەشە نۇر-سۇلتان قالاسىنداعى حالىققا قىزمەت كورسەتەتىن مامانداندىرىلعان ورتالىقتا ءۇش ادام عانا جۇرگىزۋشى كۋالىگىن الدى. بۇل دەگەنىمىز، باقىلاۋ كۇشەيتىلدى. قوسىمشا ادامداردى قويدىق. ولار ەمتيحانعا كىرەتىن ادامداردى تەكسەرىپ وتىرادى، – دەدى مۋسين.
پىكىر قالدىرۋ