استانانىڭ الماتى اۋداندىق №2 سوتى اۋىلشارۋاشىلىق ۆيسە-مينيسترى ءمۇسىلىم ومىرايەۆتى "اسا ءىرى كولەمدە پارا الۋ" تۋرالى ايىپپەن قاماۋعا الۋ تۋرالى سانكسيا شىعاردى. بۇل تۋرالى today.kz سايتى حابارلادى. 
قارجى پوليسياسى 26 جەلتوقسان كۇنى "سوت ومىرايەۆتى قىلمىستىق ءىس ماتەريالدارى نەگىزىندە قاماۋعا الۋ تۋرالى سانكسيا شىعارعانىن" حابارلادى.
ءمۇسىلىم ومىرايەۆتى پوليسيا 21 جەلتوقسان كۇنى "جەكە كاسىپكەردەن تەندەردى جەڭىپ الۋىنا كومەكتەسۋ ءۇشىن 100 مىڭ اقش دوللارى كولەمىندە پارا الدى" دەگەن كۇدىكپەن ۇستاعان ەدى. ۇستالعان كۇنى ونىڭ ۇستىنەن "اسا ءىرى كولەمدە پارا الۋ" فاكتىسى بويىنشا قىلمىستىق ءىس قوزعالعان.
ەستەرىڭىزگە سالا كەتەيىك، اۋىلشارۋاشىلىق ءمينيسترى اسىلجان مامىتبەكوۆ ءمۇسىلىم ومىرايەۆ ۇستالعاننان كەيىن "ەگەر ورىنباسارىنىڭ كىنالى ەكەنى سوتتا دالەلدەنسە وتستاۆكاعا كەتەتىنىن" مالىمدەگەن بولاتىن.
پىكىر قالدىرۋ