شىمكەنتتە قوعامدىق كولىك جۇرگىزۋشىلەرى بىلىكتىلىگىن ارتتىرۋ بويىنشا وقۋ كۋرسىنان ءوتتى. شىمكەنت قالاسىندا بيىل قوعامدىق كولىك جۇرگىزۋشىلەرىنىڭ بىلىكتىلىگىن ارتتىرۋ بويىنشا وقۋ كۋرسى باستالعان بولاتىن.

جىل باسىنان بەرى «جولاۋشى تاسىمالىنىڭ ەرەجەلەرى جانە قاۋىپسىزدىگى»، «مەديسينالىق كومەك كەلگەنگە دەيىنگى العاشقى كومەك»، «پسيحولوگيا جانە كونفليكتولوگيا نەگىزدەرى»، «كاسىبي ەتيكا جانە قارىم-قاتىناس مادەنيەتى» تاقىرىبىندا دارىستەر جۇرگىزىلۋدە.

تاسىمالداۋشى كومپانيالاردىڭ 1100 جۇرگىزۋشىسى وقۋ كۋرسىنان وتۋگە كەلىسىمشارت جاساسقان. بۇگىندە 80 جۇرگىزۋشى ءدارىستى اياقتاپ، سەرتيفيكاتقا يە بولدى. باعدارلاماعا سايكەس، ءدارىس 3 كۇن جۇرگىزىلەدى. سوڭىندا قاتىسۋشىلار تەست تاپسىرىپ، 1 جىلعا جارامدى سەرتيفيكاتقا يە بولادى.

سونىمەن قوسا، شىمكەنت قالاسىنىڭ قوعامدىق كولىك جۇرگىزۋشىلەرىنىڭ ءبىرىنعاي «avtopark-shymkent.kz» بازاسىنا ەنەدى.