شىمكەنتتە كىتاپ وقۋ مادەنيەتىن قالىپتاستىرۋ ماقساتىندا "كىتاپ وقيتىن شىمقالا" اتتى بۋكروسسينگ ءوتتى.
ەل تاۋەلسىزدىگىنىڭ 30 جىلدىعىنا وراي وتكەن ءىس-شارانى قالاداعى اباي كىتاپحاناسى ۇيىمداستىرىپ وتىر.
قالا تۇرعىندارىن ادەبي شىعارمالاردى وقۋعا باۋلۋ ءۇشىن "ءنۇرسات" شاعىناۋدانى №130 مەكتەپتىڭ جانىنا ەكى كىتاپ سورەسى قويىلدى. كەز-كەلگەن قالا تۇرعىنى سورەدەگى ۇناتقان كىتاپتى وقۋعا الىپ، ورنىنا قايتا اكەلىپ قويادى. نەمەسە، ۇيىندەگى وقىلعان ادەبي شىعارمالاردى بۋككروسسينگ بۇرىشىنا سىيعا دا قالدىرا الادى.
كوشەدەگى كىتاپ سورەسى قالا تۇرعىندارىن كىتاپ وقۋعا باعىتتاۋمەن بىرگە، جاۋاپكەرشىلىك، ادالدىق، تازالىق سەكىلدى قاسيەتتەردى دە قالىپتاستىرادى. ويتكەنى كىتاپ سورەسى باقىلاۋسىز، اشىق الاڭدا ورنالاسقان.
كىتاپ سورەسىنە QR قوسىمشاسى دا ورناتىلعان. كىتاپسۇيەر قاۋىم بۇل قوسىمشا ارقىلى كىتاپحانا تۋرالى جانە ونداعى ادەبي شىعارمالار مەن اۆتورلار تۋرالى مالىمەتكە قانىق بولادى.
ۇيىمداستىرۋشىلاردىڭ سوزىنشە، بۇگىندە قاراتاۋ اۋدانىندا جۇزەگە اسقان باستاما الداعى ۋاقىتتا قالانىڭ باسقا اۋداندارى مەن گۇلزارىندا جالعاسادى.
پىكىر قالدىرۋ