الەۋمەتتىك ءمانى بار ازىق-تۇلىك تاۋارلارى بويىنشا باعا تۇراقتىلىعىن ساقتاۋ ماقساتىندا شىمكەنت قالاسىنىڭ اكىمدىگى تاراپىنان وڭىرلىك تۇراقتاندىرۋ قورىنا 4،7 ملرد. تەڭگە باعىتتالدى. «اينالىم سحەماسىنا» سايكەس، 16 قازانداعى جاعداي بويىنشا 5،4 ملرد. تەڭگە اينالىمعا ءتۇسىپ، قالامىزدا ماقساتتى دەڭگەي 114،9 پايىزعا ورىندالدى. بۇل تۋرالى سەنبى كۇنى ق ر پرەمەر-مينيسترى ا.ءماميننىڭ توراعالىعىمەن وتكەن سەلەكتورلىق ماجىلىستە ەلىمىزدىڭ ساۋدا جانە ينتەگراسيا ءمينيسترى باقىت سۇلتانوۆ مالىمدەدى.

ناتيجەسىندە 20 مىڭ توننادان استام الەۋمەتتىك ءمانى بار ازىق-تۇلىك تاۋارلارىنا ساتىپ الۋلار جۇرگىزىلدى. بۇل ساناتتاعى ازىق-تۇلىك تاۋارلارىنىڭ قاتارىنا 19 ءونىم تۇرلەرى جاتادى: ۇن، نان، ماكارون ونىمدەرى، تۇز، جۇمىرتقا، قاراقۇمىق، كۇرىش، قانت، كۇنباعىس مايى، سارى ماي، سيىر جانە قۇس ەتى، ءسۇت، ايران، سۇزبە، كارتوپ، ءسابىز، پياز، قىرىققابات.
وتكەن اپتادا كورسەتىلگەن ازىق-تۇلىك تاۋارلارىنا باعا تۇراقتىلىعى ساقتالدى. كۇرىش، ءسابىز، پياز، شەكەردىڭ باعالارى 0،3–3،7 پايىز ارالىعىندا تومەندەگەن.

«اينالىم سحەماسىنا» قالامىزداعى ءىرى ساۋدا جەلىلەرى تارتىلعان. ساۋدا ورتالىقتارى دەلدالدىق ۇيىمداردىڭ قاتىسۋىنسىز وپەراتورمەن تىكەلەي كەلىسىمشارتقا وتىرعان. وپەراتور كەلىسىمشارت تالاپتارىمەن بەكىتىلگەن شارتتاردىڭ ورىندالۋىن باقىلاپ، مونيتورينگ جۇرگىزەدى. جۇيە شەڭبەرىندە وپەراتور دا، ساۋدا ورتالىقتارى دا كەلىسىمشارت تالاپتارىن ساقتاي وتىرىپ، باعانى وسى قۇجاتتا ايقىندالعان دەڭگەي كولەمىندە ساقتالۋىنا كەپىل بولادى.

قالامىزدا ءقازىر مۇنداي كەلىسىمشارتتار «Magnum Cash & Carry»، «GraMad Hypermarket»، «فيركان» ساۋدا جەلىلەرىمەن تۇزىلگەن. ءبۇل جۇيەنىڭ تيىمدىلىگى ەسكەرىلىپ، اۋىل شارۋاشىلىق ونىمدەرىنە فورۆاردتىق كەلىسىمشارتتار ءتۇزۋ جوسپارلانعان.