شىمكەنتتە ەپيدەميولوگيالىق جاعداي تۇراقتى. بۇل تۋرالى قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ باسپا ءسوز وتىرىسىندا مالىمدەدى. دەگەنمەن، ارقانى كەڭگە سالۋعا ءالى ەرتە دەگەن مەگاپوليستىڭ باس دارىگەرى، كۇن سۋىتا ءورشيتىن تۇماۋ ماۋسىمىنا دايىن بولۋىمىز كەرەك، دەپ ءتۇيدى.

ءدال قازىرگى تاڭدا كورونوۆيرۋس ينفەكسياسىن جۇقتىرعان 1136 ناۋقاس تىركەلگەن. ونىڭ، 406-ى ستاسيوناردا ەم قابىلداۋدا. ول جەردىڭ توسەك-ورىن تولىمدىلىعى 50% قۇراپ وتىر. وسى ورايدا، ەپيدەميولوگيالىق احۋالدىڭ تۇراقتالۋىنا بايلانىستى قالادا 2977 توسەك – ورنى جابىلعان. ال، جان ساقتاۋ بولىمىندە 364 ورىن قىسقارتىلىپتى. قالعان 180 توسەكتىڭ بۇگىندە 68 –ءى بوس ەمەس ەكەن. جىل باسىنان بەرى ۆيرۋس جۇقتىرعان 34 811ناۋقاس انىقتالسا، ونىڭ 33 191 ەمدەلىپ شىققان. وكىنىشكە وراي، 1134 ادام اۋرۋىنان ايىقپاستان كوز جۇمعان. ولاردىڭ باسىم كوپشىلىگى ۆاكسينا سالدىرماعان، دەيدى مەگاپوليستىڭ باس دارىگەرى.

باقىتجان پوزيلوۆ، شىمكەنت قالالىق دەنساۋلىق ساقتاۋ باسقارماسىنىڭ باسشىسى
- بۇگىندە كورنوۆيرۋسپەن قاتار تۇماۋعا قارسى ەكپە ەگۋ جۇمىستارى جۇرگىزىلۋدە. وسى ورايدا، ۆاكسينالاردىڭ ۋاقىت ارا قاشىقتىعىن قاتاڭ ساقتاۋ قاجەت، دەيدى سالاعا جاۋاپتى باسقارما باسشىسى. قالادا 45 ەكپە ەگۋ پۋنكتى بار. ولار تاڭعى ساعات 8 دەن باستاپ كەشكى 20:00 دەيىن جۇمىس جاسايدى. COVID-19 ىندەتىنە قارسى ەكپەنىڭ بۇگىندە 1ء-شى كومپونەنتىن 89،3% ادام سالدىرسا، 2 كومپونەنتىن سالدىرعانداردىڭ كورسەتكىشى 74،2% قۇراپ وتىر.

شىمكەنتتىڭ باس دارىگەنىڭ سوزىنە سەنسەك، قالادا COVID-19 ىندەتىنە قارسى ەكى ايلىق دارىلىك زاتتار جانە مەديسينالىق بۇيىمدار قورى جەتكىلىكتى. بۇل رەتتە دەنە قىزۋىن تومەندەتەتىن دارىلەر 1 ملن. 261 مىڭ ناۋقاسقا، ۆيرۋسقا قارسى پرەپاراتتار 217 675 ناۋقاسقا، انتيبيوتيكتەر 313 801 ناۋقاسقا، انتيكواگۋليانتتار 13 383 ناۋقاسقا، گورمونالدى پرەپاراتتار 53 192 ناۋقاستى ەمدەپ شىعۋعا جەتكىلىكتى كورىنەدى.