شىمكەنتتەگى «ت-باس» تاسىمالداۋشى كومپانياسىنا تيەسىلى №18 اۆتوبۋس پيلوتتىق جوبا رەتىندە كوندۋكتورسىز قىزمەت كورسەتۋدە. دەمەك اۆتوبۋسقا مىنگەن ءاربىر ازامات ءوزى ەلەكتروندى تۇردە جولاقىسىن تولەيدى. ونىڭ بىرنەشە جولى بار: «تولەم» كارتاسى، sms كود جانە qr كود ارقىلى جولاقىسىن تولەي الادى.

جوبا بويىنشا مارشرۋت سحەماسىندا 7 ايالداما بويىندا 10 ريەۆيزورلى باقىلاۋشى ماماندار اۆتوبۋستاعى جولاۋشىلاردىڭ جول اقىسىن تولەگەن نەمەسە تولەمەگەنىن، ەگەر قولما-قول تولەم جاساعان جاعدايدا بيلەت العاندىعىن تەكسەرىپ وتىرادى.

پيلوتتىق جوبانىڭ ماقساتى - اشىقتىقتى قامتاماسىز ەتۋ، جۇرگىزۋشىنىڭ جالاقىسىن كوتەرۋ، تۇرعىندارعا ساپالى قىزمەت كورسەتۋ، جولاقى تولەمىن اۆتوماتتاندىرۋ، جالپى العاندا قوعامدىق كولىكتەردە مادەنيەتتىلىكتى قالىپتاستىرۋ.

بۇل جۇيە الەمدە جانە ەلىمىزدىڭ نۇر-سۇلتان، الماتى سەكىلدى مەگاپوليستەرىندە ىسكە اسقان.