1 قازان كۇنى تاڭەرتەڭ ورەگونا شتاتىنىڭ وڭتۇستىك-باتىسىندا ورنالاسقان Umpqua Community كوللەدجىندە قىرعىن اتىستىڭ ناتيجەسىندە 10 ادام قازا تاۋىپ، 7 ادام جاراقات العان. بۇل تۋرالى «قامشى» پورتالى nbcnews.com-عا سىلتەمە جاساي وتىرىپ حابارلايدى.  اتىستى شىعارعان بۇلىكشى ءوز قۇرباندارىن ولتىرمەس بۇرىن ولاردىڭ ءدىني نانىم-سەنىمى تۋرالى اقپارات تالاپ ەتكەن كورىنەدى. 
بۇلىك شىعارعان ادام دۋگلاس وكرۋگى وكىلدەرىمەن بولعان اتىستا قازا تاپتى دەپ مالىمدەدى شەريف دجون حانلين. كوپتەگەن قۇقىق قورعاۋ ورگاندارى ونىڭ تۇلعاسىن انىقتاپتى. قىلمىسكەر 26 جاستاعى كريس حارپەر مەرسەر بولىپ شىقتى. ءبىراق، شەريف دجون ءحانليننىڭ ايتۋىنشا، مۇنداي سوراقى ارەكەتكە بارعان ادامنىڭ اتىن شىعارۋدىڭ قاجەتى جوق.

«ءبىزدىڭ تاراپتان ەندىگى رەتتە ونىڭ ەسىمىن ەستىمەيتىن بولاسىزدار، اتىن اتاۋعا ول ءتىپتى لايىق ەمەس»، - دەدى حانلين بەيسەنبى كۇنى جاساعان مالىمدەمەسىندە.

شتاتتىڭ باس پروكۋرورى ەللەن روزەنبليۋم جانە وزگە دە رەسمي تۇلعالار ەڭ العاشقى باياندامالارىندا روۋزبۋرگ ايماعىندا بولعان وقيعا ناتيجەسىندە 13 ادام قازا تاپتى دەپ ايتقان بولاتىن. ءبىراق تەرگەۋ جۇمىسىنىڭ بارىسىندا، بۇل اقپاراتتىڭ قاتە ەكەنى انىقتالدى. «مىناداي قورقىنىشتى جاعدايدىڭ اياسىندا، ءبىر ادامدى بىرنەشە رەت ساناپ جىبەرگەن بولۋىمىز كەرەك»، - دەپ پىكىر ءبىلدىردى قاتەلەسكەندەر.

«قازىرگى تاڭدا 10 ادامنىڭ قازا تاپقانى جونىندەگى اقپارات ەڭ ناقتى ەكەنىنە سەنىم بىلدىرۋلەرىڭىزدى سۇرانامىز»، - دەدى حانلين مىرزا.

قۇقىق قورعاۋ ورگاندارىنىڭ ايتۋىنشا، وقيعا ورنىنان 4 قارۋ تابىلدى: 3 تاپانشا جانە AR-ستيلىندەگى زەڭبىرەك.

«ءبىز ءۇشىن بۇل وتە ۇزاق ءارى وتە قاسىرەتتى كۇن بولدى. ءبىراق، كوپتىڭ ەڭسەسى قۇلاماس ءۇشىن ءبىزدىڭ بەكەم بولۋىمىز كەرەك»، - دەدى كوللەدجدىڭ ۋاقىتشا پرەزيدەنتى ريتا كانۆين جۋرناليستەرگە بەرگەن سۇحباتىندا.

ال اقش پرەزيدەنتى باراك وباما قوعامدا قارۋدىڭ كەڭ تارالعانىنا كوڭىلسىزدىك بىلدىرۋدە. «ءدال مىنا جاعدايدا جاي عانا دۇعا قىلۋ جەتكىلىكسىز، ىسكە كوشۋ كەرەك»، - دەپ پىكىر ءبىلدىردى.

نازگۇل نازار