ۇلتتىق ەكونوميكا ءمينيسترى اسەت ەرعالييەۆ ازىق-تۇلىك قىمباتشىلىعىنا بايلانىستى پىكىر ءبىلدىردى.  

– باعانىڭ وسۋىنە قاتىستى ايتاتىن بولسام، ماۋسىمدىق وزگەرىستەر بولۋى مۇمكىن. جەلتوقسان ايىندا مەرەكە كۇندەرى ازىق-تۇلىك باعاسى كوتەرىلەتىنىن ءبارىمىز جاقسى بىلەمىز. ءبىز ءبارىمىز جاڭا جىلعا دايىندالىپ جاتىرمىز، باعالار ۇنەمى ءوسىپ كەلەدى. بارىنەن بۇرىن ازىق-تۇلىك قىمباتتايدى، –  دەدى اسەت ەرعالييەۆ ءماجىلىس كۋلۋارىندا.

سونداي-اق مينيستر ءقازىر دۇكەندە نان مەن كارتوپ قانشا تۇراتىنىن جانە ءوزى ازىق-تۇلىككە ايىنا قانشا جۇمسايتىنىن ايتتى. 

– نان 130 تەڭگە تۇرادى، تۇرىنە بايلانىستى. كارتوپ 425 تەڭگە شاماسىندا. ازىق-تۇلىككە ايىنا 50-60 مىڭ تەڭگە جۇمسايمىز. بارلىق وتباسىلار سياقتى قانت، ۇن، ءسۇت الامىز، –  دەدى ول.

قازاقستاندا قىمباتشىلىق سالدارىنان تاپقان تابىستى تۇتىنۋ تاۋارلارىنا جۇمساۋ كورسەتكىشى الدىڭعى جىلدارعا قاراعاندا ەداۋىر وسكەن.

قامشى تىلشىسىنە تۇرعىندار ايلىعىنىڭ كوپ بولىگىن ازىق-تۇلىككە جۇمسايتىنىن، قىمباتشىلىق سالدارىنان ايلىعى جەتپەيتىنىن ايتقان.